Úlfar Þormóðsson 20/05/2015

Á að kjósa?

Það eru þúsundir launamanna í verkfalli þessa dagana. Þar á meðal fjölmennir hópar opinberra starfsmanna. Og þeim mun fjölga á næstu dögum. En ríkisstjórnin gerir ekkert til þess að liðka fyrir samningum. Þvert á móti. Einstaka ráðherrar og þingmenn herða deilur með óhefluðum orðum og athugasemdum.

bjarni-sigmundur

Það er fjöldi mála, vondra og miðlungsgóðra, sem stjórnin á eftir að leysa. En hún gerir ekkert í því. Hvers vegna veit svo sem engin nema þeir sem í henni sitja. Ef þeir gera sér þá grein fyrir því.

Í öllu ráðleysinu gerist það svo að fjármálaráðherrann skrifar grein. Og hún er um allt annað en það sem á dynja fer. Þar sem það er alkunn aðferð þeirra sem eru að flýja vanda, að ræða hann ekki, heldur breyta umræðunni, spyr nú maður mann:

 

Gæti verið að formaður Sjálfstæðisflokksinshefi fengið leyfi til þess hjá öldungaráðinu, sem ræður flokki hans, að rjúfa stjórnina og láta kjósa? Hvaða önnur skýringin er á því að hann birtir grein í Útgerðar-Mogganum um mál sem ekki er í umræðunni nú í öngþveitinu en nýtur lýðhylli; nauðsynlegar breytingar á stjórnarskránni? Slíkt þjóðþrifamál gæti auðveldlega fært flokknum atkvæði í kosningum.

Þetta gerir formaðurinn á sama tíma og Framsóknarflokkurinn hefur lýst því yfir að þar á bæ séu menn einhuga um breytingar á lögum um húsnæðismál og það í andstöðu við Sjálfstæðisflokkinn. Lánlausir frammarar eru greinilega að gera húsnæðisekluna að kosningamáli. Það gæti aflað þeim atkvæða.

Með því að koma fram með vinsæl mál og kanínur í hatti, láta kjósa í sumar og endurnýja meirihlutann, gæti stjórnin framkvæmt allar þær skaðlegu hugmyndir sem hún hefur á prjónunum á nýjum hveitibrauðsdögum.

Úlfar Þormóðsson
Latest posts by Úlfar Þormóðsson (see all)
Flokkun : Pistlar
0,767