Vigdísarmetið slegið

Nú hefur hið ómögulega gerzt: Vigdísar Hauksdóttur-metið í þvælu hefur verið slegið.

Nýi methafinn er oddviti Framsóknarflokksins í Reykjavík. Henni hefur nú á skömmum tíma tekizt að yfirbjóða flokkssystur sína svo rækilega með þvættingi að með undrum veraldar má kalla.

Vigdís á að vísu heildarmetið ennþá, en á örfáum vikum hefur Sveinbjörg Birna tryggt sér sigur í bulli-per-munnopnun.

Ég ætla ekki að ræða efnislega það sem hún hefur sagt. Maður rífst ekki um það hvort jörðin er flöt. Og það stígur enginn viljandi í drulludý sem þekkir afleiðingarnar.

Hins vegar er rétt að minna á, að Sveinbjörg Birna er ekki aðeins oddviti í höfuðborginni fyrir þann flokk sem fer með forsætisráðuneytið. Hún er líka formaður Landssambands framsóknarkvenna.

Því er rétt að spyrja: Er flokkurinn sammála oddvita sínum? Er formaður flokksins sammála oddvita sínum? Endurspegla sjónarmið hennar almennar skoðanir innan flokksins eða bara meðal framsóknarkvenna?

Eru viðhorf forystumanns framsóknarkvenna svo útbreidd að von sé á fleiri keppendum innan úr flokknum til að gera atlögu að metinu?

Ósköp væri gagnlegt að vita það. Fyrir kosningar.