Valgerður Bjarnadóttir 24/10/2016

Varist eftirlíkingar

Pólitík er fúlasta alvara. Viðfangsefni stjórnmálanna er þjóðfélagið. Í hvernig þjóðfélagi viljum við búa ? Þeir sem hafa skoðun á því eiga einnig að láta sig stjórnmál skipta. Allir eiga að nýta kosningaréttinn.Samfylkingin

Samfylkingin er klassískur jafnaðarmannaflokkur. Við viljum jöfnuð og öflugt velferðarkerfi. Við þurfum öflugt atvinnulíf til að standa undir þessum stefnumálum. Við þurfum öflugt menntakerfi til að standa undir nýsköpun og öflugu atvinnulífi.

Arður af sameiginlegum auðlindum á að renna til þjóðarinnar. Arður af auðlindum er ekki skattur heldur eðlilegt afgjald fyrir að nýta þær. Stjórnmálamenn eiga ekki að ákveða afgjaldið. Það á að ákveða á markaði. Þess vegna viljum við útboð á aflaheimildum.

Hér á landi eru launin of lág, matur of dýr og vextir of háir. Þessu þarf að breyta, annars flytur unga fólkið burt og kemur hingað bara í sumarfríum. Við viljum að unga fólkið vilji búa hér, vilji flytja aftur heim. Við viljum byggja upp þjóðfélag sem er eftirsóknarvert að búa í. Þjóðfélag sem byggir á klassískum gildum jafnaðarmanna um frelsi, jafnrétti og bræðralag. – Varist eftirlíkingar í kosningum á laugardaginn.

 

 

Flokkun : Efst á baugi, Pistlar
0,726