Guðmundur Gunnarsson 27/10/2014

Ungverjaland / Ísland

Hef verið undanfarna daga í Ungverjalandi. Víða um landið voru nú um helgina töluverð mótmæli á götum úti. Lögreglan var allstaðar og fylgdist vel með. Efnahagsleg staða landsins er mjög slæm, heilbrigðiskerfið í miklum vanda, tryggingakerfið líka lífeyrir er liðlega 40 þús. kr. á mán. og algeng laun opinberra starfsmanna eru um 80 þús. kr. eftir skatta. Sem sagt stórir hópar í þjóðfélaginu eiga erfitt með að ná fram að næstu mánaðarmótum.búdapest

 

Ungverska heilbrigðiskerfið hefur verið mjög gott og hér eru taldir vera bestu læknaskólarnir í Evrópu. Margir íslenskir læknar hafa lært hér og nú eru um 80 íslenskir læknar hér við nám. Þeir eru eftirsóttir allstaðar og fá mörg virkilega góð tilboð um störf.

 

Fararstjórinn okkar er ungverskt/íslensk kona. Hún segir að stjórnmálamenn hér séu á vitrænum mælikvarða á mjög svipuðum slóðum og þeir íslensku. Sama eigi við um forseta landsins. Hann þolir ekki neikvæða umræða um stöðuna í landinu og vill koma böndum á netmiðlana, Hann er endurtekið með allskonar fullyrðingar í fjölmiðlum sem mjög fáir Ungverja skilja. Hann hefur ástríðu fyrir fótbolta og hefur látið byggja fjölda glæsilegra fótboltavalla víða um landið á meðan tryggingar- og heilbrigðiskerfið grotnar niður.

 

Það er mikil spilling hérna stjórnmálamenn hafa selt ríkisfyrirtækin, svo einkennilegt sem það er nú þá skilar söluverðið sér aldrei í ríkiskassann gufar upp og talið að það hafi „óvart“ lent á leynireikningum á Jómfrúareyjum.

 

Stjórnmála- og auðmennirnir hafa tögl og hagldir í útgáfu prentmiðla en ráða vitanlega engu um hvað fólk birtir í netheimum. En nú æltar forsetinn að gera átak í að ná tökum á netheiminum. Setja bönd á netmiðla og stórhækka aðgangsgjöld að netinu. Þar telja þeir sig geta náð langt því mjög margir muni einfaldlega ekki hafa efni á að tengjast netinu.

 

Forsetinn og hérlendir stjórnmálamenn svara aldrei þegar þeir eru spurðir beinna spurninga og virðast líta á málefnalega umræðu sem eitthvað sem ástæðulaust sé að verja tíma í skoða. Þeir slá um sig með allskonar loforðum og fullyrðingum sem þeir síðnan virðast hafa gleymt í næstu setningu í viðtölum.

 

Þetta er ástæða mótmælanna. Það er mikil samkennd með þjóðinni og Ungverjar hafa gengið í gegnum mörg stríð til þess að verja sjálfstæði sitt. Hér hafa undanfarið ráðið ríkjum sterkefnaðir stjórnmálamenn og þeir fylgja hægri stefnu. Vaxandi fjöldi Ungverja talar um að það hafi verið skömminni skárra að búa hér á meðan Sovét kommarnir réðu ríkjum.

búdapest 1

Það margt sem maður kannast við að heiman þegar rætt er um stöðu Ungverjalands.

 

Ungverjar eru ákaflega þægilegt fólk. Búdapest er með fallegustu borgum Evrópu, gott samgöngukerfi og verðlag er í flestu amk helmingi lægra en heima. Þeir sem hafa það betra en aðrir henda ekki fötum í gámana, heldur skilja þá í plastpokum til hliðar við gámana ef einhver vill nota fötin. Þar eru helst ellilífeyrisþegar og atvinnulausir sem nýta þá aðstoð. Einnig er algengt að setja matarafganga í plastbakka og setja á til hliðar við gámana. Margir gauka einhverjum peningum að fullorðnu fólki.

Flokkun : Pistlar
0,759