Karl Th. Birgisson 07/11/2016

Tóm della

Eftir kosningar hófst fjölmenn og fjörleg keppni.Samfylkingin

Hún var um hver gæti gefið út stórkarlalegustu yfirlýsinguna um að Samfylkingin væri ónýt, búin að vera eða dauð. Eða allt í senn. Ég krýni engan sigurvegara hér en margir koma til greina.

Og hann ætti enda engin verðlaun skilin heldur. Þessar yfirlýsingar voru nefnilega alveg út í hött.

Flokkar eins og Samfylkingin deyja ekki af því að þeir fá lítið fylgi í kosningum. Jafnvel tvisvar í röð.

Hví ekki? heyri ég ykkur spyrja. Fyrir því er ein höfuðástæða: Fólkið í flokknum.

Er vogandi að vitna í Styrmi Gunnarsson? Hann kom á fyrsta landsfund Samfylkingarinnar, leit yfir hópinn og sagði efnislega: Þetta verður eitthvað.

Styrmir hefur stundum rétt fyrir sér.

Innan Samfylkingarinnar er nefnilega saman komin meiri þekking og reynsla en í nokkrum öðrum stjórnmálaflokki á Íslandi. Þetta er stór fullyrðing, en henni verður trauðla andmælt.

Þessi þekking og reynsla býr í núverandi og fyrrverandi þingmönnum (þeir skipta tugum), núverandi og fyrrverandi sveitarstjórnarfólki (þau skipta trúlega hundruðum) og hjá ótölulegum fjölda fólks út um allt í samfélaginu, sem vill flokknum allt hið bezta og vill vinna honum gagn, en hefur ekki fundið sér farveg til þess í þeim kúltúr sem einkennt hefur Samfylkinguna undanfarin ár.

Ég nefni bara sem dæmi: Ekki er til sá hópur fólks sem veit meira um velferðarmál en Samfylkingarfólk. Sama gildir um Evrópu-, auðlinda- og heilbrigðismál.

Nýrrar forystu bíður meðal annars það verkefni að virkja þetta fólk til vinnu og hugmyndaframlags. Mér lízt raunar einkar vel á nýja formanninn. Það er einhver ferskur blær í kringum hann, kraftur og hispursleysi.

Viðfangsefni Samfylkingarinnar á næstu misserum er ekki að láta flokksmenn sitja hnípna saman í hring og svara spurningunni: Hvað gerðum við vitlaust og hverjum er um að kenna? Það er gamli kúltúrinn.

Eitt af stærstu verkefnum formannsins á næstunni verður að fá allt sitt hæfileikaríka fólk til að svara þessum spurningum: Hvað gerum við rétt? Hver er með beztu hugmyndina? Og ekki síður mikilvægt: Hvernig vinnum við kosningar?

Þetta verður mikil vinna. Nýi formaðurinn þarf þess vegna einkum tvennt: Að hafa tímann sem fylgir því að vera í stjórnarandstöðu. Hins vegar þolinmóða og skilningsríka fjölskyldu.

Og auðvitað stuðning og aðstoð okkar sem vitum að allt þetta taugaveiklunartal um andlát Samfylkingarinnar er tóm della.

0,768