Karl Th. Birgisson 18/04/2014

Til nokkurs pissað

Tveir prófessorar við Hákóla Íslands, Hannes H. Gissurarson og Stefán Ólafsson, hafa um nokkurt skeið átt með sér pissukeppni.

Hún er í  grófum dráttum þannig, að Stefán birtir tölur og gröf um skaðsemi frjálshyggjunnar, fátækt og fleira.

Hannes reynir á móti að spæla Stefán með því að hann hafi nú haft rangt fyrir sér um hitt og þetta. Svona halda þeir áfram og enginn man lengur hvar þeir eru staddir í þessu furðulega þrasi.

Eitt atriði er þó undarlegast, en það er ásökun um meint trúnaðarbrot Stefáns við meðferð skoðanakönnunar sem Hreinn Loftsson lét gera 1996. Þetta er svo mikilvægt, að síðast í dag skrifaði Hannes pistil um málið, þar sem hann birtir tölvubréf frá Hreini, sem virðist sýna að Hannes hafi rétt fyrir sér en Stefán rangt.

Nú veit ég ekki hvað gerðist þarna árið 1996 og enn síður hyggst ég skipa mér í sveit með öðrum hvorum. Vel má vera að Stefán hafi rofið trúnað og slíkt á maður vitaskuld ekki að gera. En þetta var fyrir átján árum, hamingjan sanna.

Í alvörunni: Finnst Hannesi eitthvað sem gerðist árið 1996 skipta máli um það sem Stefán Ólafsson segir og gerir núna? (Ætli það sem Hannes hefur sagt og gert sl. átján ár birti gæfulega mynd af honum sjálfum, væri það tekið saman?)

Það er sérstakt umhugsunarefni, að prófessor við Háskóla Íslands skuli finnast sér sæmandi að standa í slíku drullukleprakasti, því að þetta er ekkert annað. Það hefur ekkert gildi, nema fyrir Hannes í pissukeppninni.

Já, ég veit, að margir efast um að Hannes hafi yfirleitt sómatilfinningu, en hann á fjandakornið að heita fræðimaður við stærsta háskóla landsins. En já, eftir á að hyggja, kannske er það ofmælt líka.

Skýringin á þessari hegðun Hannesar er sorglega nærtæk. Umrædd skoðanakönnun var nefnilega um hvort Davíð Oddsson ætti að bjóða sig fram til forseta þarna um árið. Niðurstaðan var sú, að það væri ekki líklegt til árangurs og Davíð ákvað að fara ekki fram.

Núna gefur Hreinn í skyn – og Hannes gerir engar athugasemdir við það – að kannske hafi ekkert verið að marka þessa afdrifaríku könnun.

Og sanniði til: Næst þegar Hannes sér færi á skrifar hann grein sem byrjar efnislega svona: „Ýmislegt bendir til, að Davíð Oddsson hefði getað náð kjöri sem forseti árið 1996 í stað Ólafs Ragnars Grímssonar.“

Og þá mun hafa verið til einhvers pissað.

0,911