Því miður

Það er nánast aukaatriði hvers vegna Stefán Eiríksson ákvað að hætta sem lögreglustjóri á höfuðborgarsvæðinu.

Jú, víst er það grafalvarlegt ef hann hrökklaðist úr embætti vegna yfirgangs og afskiptasemi Hönnu Birnu Kristjánsdóttur, eins og DV fullyrðir og enginn hefur neitað, ekki einu sinni hann sjálfur afdráttarlaust.

Hitt er miklu alvarlegra, að ráðherra lögreglumála hafi kallað lögreglustjórann á sinn fund til að ræða um sakamálarannsókn sem hún og hennar nánasta samstarfsfólk sætir. Og séð ástæðu til að hringja í hann líka vegna sama máls.

Þetta hefur enginn borið til baka eða þrætt fyrir. Hún hefur ekki einu sinni reynt það sjálf.

Hanna Birna átti að víkja sem ráðherra lögreglumála um leið og ljóst var að ráðuneyti hennar og starfsfólk sættu sakamálarannsókn. Það er eðlileg stjórnsýsla 101.

En að það skuli hafa svo mikið sem hvarflað að ráðherra lögeglumála að skipta sér með þessum hætti af rannsókninni – hvað þá að hafa í raun og veru gert það – staðfestir endanlega að Hanna Birna Kristjánsdóttir er í starfi sem hún ræður ekki við.

Því miður.