Jón Daníelsson 24/05/2014

Stórsigur Framsóknar?

Það yrði óneitanlega bæði stór og óvæntur sigur ef Framsóknarflokknum tækist að fá kjörinn einn borgarfulltrúa eftir allt sem á undan er gengið. Bæði á bloggsíðum og Facebook er yfirlýsing Sveinbjargar Sveinbjörnsdóttur um mosku í Reykjavík mikið til umræðu í dag og flestir virðast sannfærðir um að hún sé endanlega búin að spila rassinn úr buxunum.

Og, jú mikil ósköp. Langflest hristum við hausinn og frábiðjum okkur rasisma af þessu tagi. En það gildir ekki um alla. Fréttastofa RÚV á hrós skilið fyrir að hafa kveikt á perunni og velt upp þeim möguleika, að Sveinbjörg gæti laðað til sín atkvæði með þessum málflutningi.

Hulda Þórisdóttir stjórnmálafræðingur sagði í kvöldfréttum RÚV að nýleg könnun hefði leitt í ljós að um 20% íslenskra kjósenda telji að innflytjendur séu alvarleg ógn við þjóðareinkenni Íslendinga. Og orðrétt sagði hún svo:

Það hefur í rauninni verið ákveðinn ráðgáta í íslenskum stjórnmálum hvers vegna það hefur aldrei þrifist flokkur sem ber mál sem þessi á borð og jafnan vekur þetta furðu t.d. erlendra stjórmálafræðinga, að það sé enginn slíkur flokkur á Íslandi.

Flokkar sem nærast á útlendingahatri þrífast ágætlega í flestum nágrannalöndum okkar og kannski bara tímaspursmál hvenær slíkur flokkur skýtur rótum hér.

Sveinbjörg hefur í örvæntingu sinni yfir litlu fylgi skotið feilpústum í allar áttir. Margt af því sem hún hefur sagt, er yfirgengilega fáránlegt. Þannig hefur hún lýst því yfir, að hún sé líklega eini frambjóðandinn sem hafi búið í útlöndum. Og hún hefur sakað meirihlutann í borgarstjórn um að „hafa viljandi komið á lóðaskorti„.

Nú gerir hún út á hatur á innflytjendendum.

Vonandi ristir andúð þessara 20% kjósenda á útlendingum ekki mjög djúpt. Það þarf nefnilega ekkert mjög marga útlendingahatara – til viðbótar við kannski 3% fastafylgi Framsóknarflokksins í Reykjavík – til að tryggja Sveinbjörgu sæti í borgarstjórn.

Það er hin hliðin á þessum fáránleikapeningi.

Og fyrir bragðið bíður maður dálítið spenntari eftir næstu könnun.

Jón Daníelsson
Flokkun : Pistlar
0,895