Starfsmenn í stafrófsröð

Lausleg talning á vefsíðu Innanríkisráðuneytisins sýnir að starfsmenn þess eru helmingi fleiri en stafirnir í íslenska starfrófinu.

Nú er svo komið að ótilgreindur fjöldi starfsmanna hefur stöðu grunaðra í glæpamáli sem ráðherrann ber ábyrgð á. Við vitum hvorki hvað margir eru í slíkri stöðu né hverjir það eru. Þau hafa verið merk með bókstöfum A, B, C o.sfrv. og eiga það öll sameiginlegt að hafa stöðu grunaðra.

Það hefur aðeins einu sinni gerst mér vitanlega að íslenskur ráðherra og ráðuneyti hans sæti lögreglurannsókn af því tagi sem Hanna Birna Kristjánsdóttir og ráðuneyti hennar hefur mátt þola. Fáir ráðherrar hafa klúðrað jafn rækilega tiltölulega einföldu máli að leysa og Hanna Birna hefur gert. Henni og pólitískum ráðgjöfum hennar virðist fyrirmunað að leysa þetta mál.

Á meðan svo er verður starfsfólk ráðuneytisins að þola það að vera merkt með bókstöfum og hafa stöðu grunaðra í meintum glæp ráðherrans.