trusted online casino malaysia
Jón Daníelsson 01/11/2014

Skammastu þín, Róbert Marshall!

robert_marshall_3_0Róbert Marshall, þingmaður Bjartar framtíðar ætti að hafa vit á að skammast sín þessa dagana. Mig skiptir svo sem engu hversu margir eru þessu sammála eða ósammála. Þetta er einfaldlega mín skoðun.

Í kosningu um forseta Norðurlandaráðs studdi Róbert Steingrím J. Sigfússon, en ekki Höskuld Þórhallsson. Hann gaf upp tvær ástæður fyrir þessari afstöðu. Önnur er ljómandi góð, en hin svo afspyrnu vond að hún er beinlínis til skammar.

Ég ætla að vitna í frétt RÚV frá í gær (31. okt) Þar er haft eftir Róbert að:

… hann hafi engan séð ganga jafn nærri sér, persónulega og pólitískt, og Steingrímur hafi gert fyrir þjóð sína á síðasta kjörtímabili. Róbert segir að honum hafi þótt það skylda sín að styðja framboð Steingríms þó ljóst væri að hann nyti minnihlutastuðnings. Þá bendir hann á að Svíar láti stjórnarandstöðunni hverju sinni alltaf eftir forsætið í Norðurlandaráði þegar hún kemur í þeirra hlut.

Þetta er ljómandi góð ástæða. Steingrímur hefði vissulega átt skilið dálitla viðurkenningu fyrir dugnað sinn og ósérhlífni.

Hefði Róbert látið þetta duga, gat afstaða hans verið bæði skiljanleg og virðingarverð. En hann lét þetta ekki duga. Vitnum aftur í sömu frétt RÚV:

Róbert segir á Facebook-síðu sinni að hann vilji ekki styðja fulltrúa Framsóknarflokksins til trúnaðarstarfa fyrr en flokkurinn hafi gert hreint fyrir sínum dyrum. Með þessu vísar hann til ummæla sem oddviti Framsóknarmanna og flugvallarvina létu falla í borgarstjórnarkosningum í vor um moskubyggingu og múslima.

Hér er slegið rækilega fyrir neðan beltisstað. Heilbrigð skynsemi leyfir ekki að setja alla meðlimi tiltekins stjórnmálaflokks undir sama hatt. Svo ógeðfelld, sem kosningabarátta framsóknarmanna í Reykavík var fyrir borgarstjórnarkosningar í vor, er beinlínis fáránlegt að tengja hana við Höskuld Þórhallsson.

Það er misjafn sauður í mörgu fé og innan Framsóknarflokksins er finna margs konar fólk . Það gildir reyndar líka um alla aðra flokka. Eftir því að dæma, sem ég hef séð til Höskuldar Þórhallssonar, fer þar heiðarlegur, drenglyndur, réttsýnn og sómakær maður. Hann á annað og betra skilið en ummæli af þessu tagi.

Róbert Marshall vegur mjög ómaklega að Höskuldi með þessum ummælum, en í leiðinni tekst honum líka að ganga alveg í berhögg við eitt helsta stefnumál Bjartrar framtíðar, nefnilega að leita sátta fremur en sundrungar.

Róbert getur kannski enn lágmarkað skaðann með því að iðrast og biðja Höskuld opinberlega afsökunar á þessum ummælum í fullri einlægni. Ég gæti nefnilega trúað að Höskuldur sé nógu veglyndur til að taka slíka afsökunarbeiðni gilda.

Að öðrum kosti býð ég ekki margar krónur í æru Róberts Marshall.

Flokkun : Pistlar
1,538