Sjálfstæðisflokkurinn hatar ekki konur. Vestmanneyingarnir unnu bara

Fréttaskýring – Karl Th. Birgisson

Gleymum kallpúngum og kjéllingum. Gleymum þessum rosalegu mikilvægu málefnum. (Geisp.) Tölum frekar um landafræði.

Það er engin leið að útskýra frá kynjafræðilegum sjónarhóli hversu illa Sjálfstæðisflokknum er við konur, eins og vinsælt er að halda fram núna. Það stenzt heldur enga skoðun. Konum í flokknum gekk bara ágætlega í sumum prófkjörum, öðrum ekki.

Skýringarnar eru mun einfaldari en kvenhatur, og þær eiga ekki bara við um Sjálfstæðisflokkinn. Þær eru landafræði og fólksfjöldi.

Prófkjör sjálfstæðismanna í suðurkjördæmi er skólabókardæmi.

Í suðurkjördæmi eru þrír staðir mikilvægastir þegar kemur að kosningum: Selfoss, Suðurnes og Vestmannaeyjar. Þar er flest fólkið og flest atkvæðin. Sorrí, Hornafjörður, Hella-Hvolsvöllur og þið hin – þið eruð bara ekki með. Þannig séð.

Prófkjör eru frumstæð fyrirbæri. Þau snúast ekki um hin fínni blæbrigði málefna eða framtíð landsins, eða einu sinni að kjósa þá beztu sem eru í boði. Úrslitin ráðast af því hverjir eru duglegastir að fá fólk til að kjósa – af þessum tiltölulega þrönga hópi sem hefur atkvæðisrétt í hverju tilviki.

Í þessum kosningum, eins og svo mörgum öðrum á svo smáum skala, er mikilvægast að kjósa sinn mann. Okkar mann. Senda okkar mann á þing.

Landafræði útskýrir úrslitin hjá Sjálfstæðisflokknum í suðurkjördæmi. Páll Magnússon var fulltrúi Vestmannaeyja. Ragnheiður Elín Árnadóttir var fulltrúi Suðurnesja. Selfoss átti engan alvörukandídat og var að því leyti opinn vígvöllur fyrir alla. Árnesingar eru hins vegar tengdari Vestmanneyingum en Keflvíkingum og líklegri til að kjósa þá.

Í þessu tilviki unnu Vestmanneyingar. Páll Magnússon vann með aðstoð maskínunnar sem skilaði Elliða Vignissyni sovézkri kosningu í síðasta bæjarstjórnarkjöri í Eyjum, langt yfir 70 prósentum atkvæða. Það var ekki tilviljun að einungis Eyjamiðlar fylgdust með talningu atkvæða fram eftir aðfaranóttu sunnudags og Vestmanneyingar fögnuðu fram undir morgun eins og þeir væru orðnir Íslandsmeistarar í fótbolta.

Regla númer tvö í prófkjöri: Ekki kjósa keppinautinn. Ragnheiður Elín var helzti keppinautur Páls Magnússonar.

Þar af leiðir: Vestmanneyingarnir, þessir sem tryggðu Páli sigurinn, kusu ekki Ragnheiði Elínu – nema þá fremur neðarlega. Í annað sætið áttu þeir mun nærtækari kost, Ásmund Friðriksson. Ásmundur er ekki bara Suðurnesjamaður, heldur er hann líka úr Vestmannaeyjum. Betra gat það ekki verið fyrir Eyjamenn, sem tryggðu Ásmundi annað sætið. Öruggur þriðji kostur var svo bjór- og samgöngubótastrákurinn úr Grindavík.

Með öðrum orðum: Ásmundur Friðriksson lenti í ekki í öðru sæti í prófkjörinu af því að hann er kall, heldur af því að hann er Suðurnesjamaður úr Vestmannaeyjum.

Af sömu ástæðu lenti Ragnheiður Elín svo neðarlega. Ekki af því að hún er kona, heldur af því að Vestmanneyingarnir unnu.

Flóknara er það nú ekki.