Jón Daníelsson 29/05/2014

Reykjavík: Úrslit ljós en samt spenna

15saetiAslaugHeidaEvaGudfinnaÞótt enn sé einn og hálfur sólarhringur þar til kjörstaðir opna, virðast úrslit kosninganna nokkuð ljós í Reykjavík. Núverandi meirihluti heldur velli. Spurningin er aðeins hvort hann fær 8 eða 9 fulltrúa. Sjálfstæðisflokkurinn tapar a.m.k. einum manni frá síðustu kosningum og þrjú framboð fá einn fulltrúa hvert: Framsókn, VG og Píratar.

Skoðanakannanir eru nú til dags orðnar svo nákvæmar, að þær fara býsna nálægt úrslitum kosninga. Það þarf því eitthvað alveg óvænt að gerast á morgun til að hagga úrslitunum að einhverju ráði.

Það er samt ekki svo, að engin spenna sé eftir. Þvert á móti virðist sem það geti ráðist af sárafáum atkvæðum hvar fimmtándi borgarfulltrúinn lendir. Mér sýnist núna líklegast að þetta verði fjórði fulltrúi Sjálfstæðisflokksins, en tveir að jafnvel þrír aðrir koma til greina.

Á rúmri viku hafa nú verið birtar sex kannanir, sem við fyrstu sýn geta virst nokkuð ólíkar, en ber raunar furðu vel saman, þegar nánar er skoðað. Fylgistölurnar eru gróflega þessar:

Samfylking: 30-37%

Sjálfstæðisflokkur: 21-24%

Björt framtíð: 19-24%

Píratar: 7,5-10%

VG: 6-9%

Framsóknarflokkur: 3-9%

Fylgisþróun

Framsóknarflokkurinn sker sig úr að því leyti að hann hefur verið á mjög hraðri uppleið. Hjá fleiri flokkum má greina ákveðna fylgisþróun. Samfylkingin virðist á uppleið á lokasprettinum, en Björt framtíð dalar lítillega. Vinstri græn virðast líka vera að tapa fylgi til Samfylkingar. Sjálfstæðisflokkurinn og Píratar eru nánast í kyrrstöðu.

Könnun Fréttablaðsins í dag sýnir að fulltrúi VG gæti staðið tæpt og ég hef séð því haldið fram að Vinstri græn gætu staðið uppi án borgarfulltrúa eftir kosningar. Mér þykir þó trúlegra að eitthvað af þeim kjósendum sem ætluðu að flytja sig frá VG til Samfylkingar hætti við og VG fái þokkalega góða kosningu

Um framboð Framsóknar, VG og Pírata gildir sem sagt nokkurn veginn hið sama. Fylgið er greinilega nóg til að fá einn mann kjörinn, en töluvert fjarri því að duga til að fulltrúi nr. 2 sé í augsýn. Samkvæmt Fréttablaðskönnuninni, sem er sú nýjasta, hefur þó „stóra moskumálið“ virkað og haldi sú þróun áfram af krafti er ekki alveg hægt að útiloka að Framsóknarfulltrúarnir verði tveir, en það verður samt að teljast afar ólíklegt.

Líkleg úrslit

Það virðist sem sagt nokkuð örugglega mega raða niður 14 borgarfulltrúum.

Samfylking – 5

Sjálfstæðisflokkur – 3

Björt framtíð – 3

Framsóknarflokkur – 1

Píratar – 1

Vinstri græn – 1

En þetta eru samt bara 14. Stólarnir í borgarstjórn eru 15 og um þann síðasta ríkir veruleg óvissa.

Hörkuspenna milli stærri flokkanna

Það er orðið alveg ljóst að Samfylkingin verður stærsti flokkurinn, fær að líkindinum nokkuð yfir 30% atkvæða og 5 fulltrúa. Sjötti borgarfulltrúinn er mjög skammt undan.

Slagurinn stendur milli Áslaugar Maríu Friðriksdóttur i 4. sæti D-lista, Heiðu Bjargar Hilmisdóttur í 6. sæti S-lista, Evu Einarsdóttur í 4. sæti Æ-lista og svo mögulega Guðfinnu Jóhönnu Guðmundsdóttur í 2. sæti B-lista.

Áslaug virðist líklegust eins og sakir standa, en möguleikar Guðfinnu ættu að vera nálægt núllinu. Til að Eva nái kjöri þarf Björt framtíð að fá fleiri atkvæði en Sjálfstæðisflokkurinn og það er fremur ósennilegt. Von Heiðu byggist á því að Samfylkingin nái um 34-35% atkvæða, en Sjálfstæðisflokkurinn fari helst ekki yfir 23%. Hvort tveggja er kannski hæpið, en verði fylgismunurinn meiri en 10%, stefnir í talsverða spennu.

Það verða að líkindum einhverjar tvær af þessum fjórum konum sem sitja taugatrekktar og naga neglurnar á kosninganótt. Það gæti vel stefnt í spennandi talningu og jafnvel að sárafá atkvæði ráði endanlegum úrslitum. En aðeins ein þeirra fjögurra verður orðin borgarfulltrúi á sunnudagsmorguninn.

Um leið ræðst hvort meirihluti Samfylkingar og Bjartrar framtíðar verður átta eða níu manna. Og það virðist sem sagt meginspurningin.

Tvær kannanir eftir

Þess má geta að lokum, að líklegast birtast tvær kannanir annað kvöld (föstudagskvöld). RÚV kynnir vafalaust nýja Gallup-könnum í kvöldfréttum fyrir lokakappræður oddvitanna í Reykjavík. Og MMR er að gera þriðju könnunina í snarpri samfellu. Ætlunin hlýtur að vera að birta hana síðdegis á morgun.

Þetta er reyndar gott framtak hjá MMR. Samanlagt munu þessar þrjár kannanir veita fróðlegt yfirlit um fylgishreyfingar síðustu vikuna fyrir kosningar. Fyrir 10-20 árum birti RÚV alltaf daglegar Gallupkannanir síðustu vikuna fyrir þingkosningar og úr þeim mátti einmitt lesa mjög skýrar fylgishreyfingar.

Á laugardagskvöldið kemur svo í ljós hversu sammála kjósendur reynast niðurstöðum þessara kannana.

——————-

Viðbót (föstudagur 30. maí, kl. 19:30)

Niðurstöður kannana MMR og Gallup sem birtust nú undir kvöld daginn fyrir kjördag, breyta ekki heildarmyndinni sem dregin var upp hér að ofan í gærkvöldi, en skerpa línurnar nokkuð. Af konunum fjórum á myndinni, virðast tvær hafa dottið út úr baráttunni um 15. sætið í borgarstjórn. Þetta eru einmitt þær sem ég taldi ólíklegri í gærkvöldi, sem sé Eva (4. sæti xÆ) og Guðfinna (2. sæti xB).

Þar með er ljóst að slagurinn stendur milli Samfylkingar og Sjálfstæðisflokks, milli Heiðu Bjargar (6. sæti xS) og Áslaugar Maríu (4. sæti xD). Áslaug nær sætinu samkvæmt MMR en Gallup spáir Heiðu þessu síðasta sæti. Munurinn er nokkuð afgerandi og stafar af mun betri útkomu Samfylkingar hjá Gallup en hjá MMR.

Það stefnir í spennandi talningu á kosninganótt, en reyndar er ekki alveg hægt að útiloka að Áslaug og Heiða nái báðar kjöri. Fylgi Bjartrar framtíðar hefur verið á niðurleið og þriðji maður á lista gæti mögulega lent í háska.

Gerist það, dregur þó síður en svo úr spennunni. Þá stendur baráttan milli þriggja um tvö sæti. Meirihluti Samfylkingar og Bjartrar framtíðar er öruggur eftir sem áður. Og eftir sem áður verður spurningin hvort sá meirihluti fái 8 eða 9 fulltrúa.

Jón Daníelsson
Flokkun : Pistlar
0,996