Ráðherra sem smálánahrappur

Ríkisendurskoðun hefur nú staðfest formlega það sem þegar var komið fram: Forsætisráðherra dreifir skattfé um landið að geðþótta og þvert gegn reglum.

Í skýrslu um styrkveitingar forsætisráðherra, einkum í hans eigið kjördæmi, kemur skýrt fram að þær ráðstafanir hafi farið gegn fyrirmælum alþingis, gengið gegn ákvæðum laga um fjárreiður ríkisins og að lágmarki farið á svig við stjórnsýslulög.

Ennfremur hafi ráðuneytið beitt blekkingum (Ríkisendurskoðun kallar það „villandi framsetningu“ af kurteisi sinni) með því að tengja þessar styrkveitingar við „Græna hagkerfið“ (sem var verkefni á vegum fyrri ríkisstjórnar). Þær komu Græna hagkerfinu ekkert við, heldur voru þetta gæluverkefni ráðherrans.

Aukinheldur hefði ráðuneytið átt að óska heimildar alþingis áður en þessum styrkjum var úthlutað, en gerði ekki. Þetta var sumsé úthlutun fjár án heimildar.

Þess í stað fór spreðiríið svona fram: Einhvers staðar í óformlegu spjalli eða símtali nefnir einhver að þetta þarna eða kannske þetta þarna hitt gæti nú verið sniðugt verkefni. Forsætisráðherra slumpar á tölu og sendir svo tilkynningu um styrkveitingu með sms-i, eins og hver annar smálánahrappur. Engar umsóknir, engin gögn, engar umsagnir, enginn rökstuðningur, engin yfirsýn, engir samningar, bara geðþótti og rassvasabókhald forsætisráðherrans.

Í sumum tilvikum hafði sá, sem fékk sms-ið, ekki einu sinni imprað á því að fé vantaði í verkefnið og hefði kosið að peningarnir færu í eitthvað annað.

Allt var þetta reyndar vitað, en nú hefur Ríkisendurskoðun staðfest það. Það gefur hins vegar lærdómsríka innsýn í hugarheim forsætisráðherrans að hann virðist ekki sjá neitt athugavert við eigin gerðir fremur en fyrri daginn, sama hversu eindregið Ríkisendurskoðun slær á sms-þumalputtann á honum.

Sem þýðir að hann myndi gera þetta allt saman forhertur aftur.

Gaman að því.