Pizzapöntunarreiknivélin

Heimsmetið í lækkun skulda heimilanna tekur sífellt á sig nýjar myndir. Upphaflega var lagt af stað með 20% lækkun skulda það var metið, eins og ítrekað kom fram í kosningaræðum Sigmundar Davíðs, upp á 280 milljarða kr. Sú upphæð átti að verða til þegar gert yrðu upp við hrægammasjóði. Þessar fullyrðingar SDG snérust síðan upp í að vera að hans eigin mati allt Samfylkingarlygi og loftárás á hann.

 

Samfylkingin hefði ekkert gert fyrir heimilin í landinu.

 

Eftir kosningar varð heimsmetið að 80 milljörðum sem íslenskir skattborgarar áttu sjálfir að leggja til. Sigmundur Davíð sagði okkur að hann hefði skipað nefnd sem væri aldeilis ótrúlega snjöll. Hún hefði komist að hinu sanna. Þessi upphæð væri niðurstaða ítarlegra rannsókna þessarar snjöllu nefndar. 80 milljarðar væri semsagt mismunur á því hversu margir höfðu átt rétt á leiðréttingu að frádreginni þeirri leiðréttingu sem heimili landsins hefðu þegar fengið.

 

Bíddu aðeins, þar fór málflutningurinn allt í einu í mótsögn við sjálfan sig. Samfylkingin hafði þá eftir allt greitt út leiðréttingar upp á 280 milljarða – 80 milljarða, eða semsagt Jóhanna var búinn að greiða heimilunum 200 milljarða króna í leiðréttingu samkvæmt könnun hinnar ótrúlega snjöllu nefndar Sigmundar Davíðs og til að klára dæmið vantaði 80 milljarða. Hvernig gátu þá 80 milljarðar verið heimsmet?

 

Fljótlega eftir áramótin sagði Sigmundur Davíð síðan okkur þjóð sinni að hann hefði fundið ótrúlega flinka menn og þeir væru búnir að búa til ótrúlega snjalla reiknivél sem reiknaði þetta allt út. Umsókn um leiðréttingu yrði ekki flóknari en að panta pizzu, þetta yrði allt tilbúið fyrir vorið.

 

En svo kom Fjármálaráðherra í sjónvarpið í gærkvöld og sagði að þetta væri bara ekki rétt hjá Sigmundi Davíð. Nú yrðu allir að bíða eftir því að sjá hversu margir myndu sækja um, þá fyrst væri hægt að fara að reikna út hvað hvert heimili kæmi til með að fá. Ef of margir sæktu um þá myndi leiðrétting hvers heimilis skerðast. Þú fengir kannski ekki heila pízzu þó hún væri pöntuð, bara 2 sneiðar.

 

Úpps. 80 milljarðarnir eru semsagt bara einhver tala sem hafði verið niðurstaða í samningaviðræðum Sjálfstæðismanna og Framsóknar.

 

Enn  eina ferðina er Sigmundur Davíð semsagt staðinn að því að segja þjóð sinni ósatt. Hann er búinn að halda því fram í allan vetur, með sinni ótrúlega snjöllu nefnd, að 80 milljarðarnir tækju mið af hversu margir ættu rétt miðað við fyrirfram gefnar forsendur. Niðurstaðan væri samansöfnuð sú upphæð sem ríkisstjórn Jóhönnu hafði svikið íslensk heimili um í 5 ár.

 

Pizzupöntunarreiknivélin hinnar ótrúlega snjöllu nefndar er semsagt bara tilbúningur Sigmundar Davíðs.

 

Vitanlega munu allir sækja um leiðréttingu. Allir munu verða óánægðir með niðurstöðuna, enda er hún byggð á hinum miklu væntingum sem Sigmundur Davíð er búinn að halda að þjóðinni. Niðurstöðu má ekki birta fyrr en næsta haust. Því Framsókn ásamt Sjálfstæðisflokknum skafa botninn í væntanlegum kosningum og örvæntingarfullir formenn þessara flokka reyna að bjarga því sem bjargað verður.