Óvitar

Það getur verið óþægilegt, jafnvel mjög vont, að vita of mikið um einstök mál. Þetta þekkja að minnsta kosti fjórir fulltrúar í stjórnskipunar- og eftirlitsnefnd alþingis. Þess vegna gengu þeir af fundi þegar upplýsa átti hverjir væru hinir valinkunnu sæmdarmenn sem ábyrgðust fyrir sinn hatt, að dæmdur barnaníðingur ætti skilið að fá uppreisn æru. Þeir vildu alls ekki vita það, fjórmenningarnir. Þeir gætu hugsanlega þekkt höfðingjana. Og hvað þá?

Óbreyttur nefndarmaður í umhverfis- og samgöngunefnd alþingis fór fram á að nefndin sem slík brygði sér bæjarleið til þess að skoða kísilver United Silicons í Helguvík, en eins og kunnugt hefur verksmiðjan hökt og hikastað og íbúar Keflavíkur kvartað mánuðum saman yfir óþef frá henni. Í fáfræði sinni hélt hinn óbreytti að það gæti verið þarflegt fyrir nefndina að kynna sér vandann þar sem hann ætti upptök sín. Formaðurinn svaraði erindi hans af mikilli snerpu og sagði nei, og bætti því við, að “ekki væri hægt að efna til slíkrar heimsóknar í náinni framtíð.”

Sama dag og vitnaðist um svarið barst fréttist af því, að reykjamökk legði frá verksmiðjunni. “ Hann er skaðlaus. Þetta er töppunarreykur. Hann er skaðlaus”, hafði ruv.is eftir öryggisstjóra fyrirtækisins.

Og þá er bara allt í þessu fína og ekkert meira um þetta að segja. Reykurinn  skaðlaus og æran er hrein.