Nýtt klósett fyrir Bjarna

Formaður fjárlaganefndar er skörungur, að sögn fyrrverandi formanns flokks hennar. Undir það tökum við auðvitað öll.

En meira að segja skörungum er ekki allt kleift, til dæmis að koma auga á öll dæmi um útgjöld ríkissjóðs sem mætti endurskoða. Það er meira en sjálfsagt að aðstoða hana.

Ríkiskaup hafa nú boðið út miklar innanhússframkvæmdir í Arnarhváli, þar sem fjármála- og efnahagsráðuneytið er til húsa. Þar á að skipta um gólfefni, loftaefni, milliveggi og ofna, endurnýja snyrtingar, raflagnir og aðrar lagnir, og setja svo lyftu í húsið.

Sko. Nú kann ég að hafa misst af fréttum þess efnis, að húsnæði fjármálaráðuneytisins sé meira og minna ónýtt. Var kannske farið að leka þar eins og á Landspítalanum? Ekki það? Hver er þá eiginlega hin knýjandi þörf á því – á okkar miklu sparnaðartímum – að ráðherrann og embættismennirnir fái ný klósett til að pissa í?

Verða þau nokkuð jafndýr og salernið hennar Sólveigar Pétursdóttur hér um árið?

Hin eina af þessum framkvæmdum sem í fljótu bragði virðist réttlætanleg (og rétt) er að setja lyftu í húsið til að auðvelda aðgengi fyrir hreyfihamlaða. En ég er viss um að þegar formaður fjárlaganefndar hefur rannsakað málið er þetta allt saman eðlilegt. Gott ef ekki brýnt.

Vettvangsskoðun fyrir verktaka var í byrjun þessarar viku, að því er segir í auglýsingu Ríkiskaupa. Og verkinu á að vera lokið eigi síðar en 19. desember 2014.

Rétt í tæka tíð fyrir jólaglöggið. Þar geta þau skálað, nefndarformaðurinn og ráðherrann, fyrir sparnaði, hagræðingu og brýnum verkefnum.

Uppfært: Athygli mín hefur verið vakin á því að upp kom myglusveppur í húsnæðinu. Það gerir þessar framkvæmdir væntanlega nauðsynlegar og ég bið hlutaðeigandi afsökunar á vitleysunni.

Andsk. Eins og ég hafði nú gaman af að skrifa þetta.