Nýjasta nýtt

Eða hvernig segir maður eiginlega „Breaking News“ almennilega á íslenzku? Hanna Birna býr nefnilega yfir þeim.

Í svolitlum mola á Eyjunni í gær segir svo um þingflokksfund sjálfstæðismanna í Vestmannaeyjum:

„Hanna Birna gerði grein fyrir sinni hlið á lekamálinu í löngu máli á fundinum og munu þar hafa komið fram allskyns upplýsingar sem ekki hafa komið fram áður. Þingmönnum var mörgum brugðið, að sögn þeirra sem til þekkja.“

Það er nú svo.

Ég hef reynt að fylgjast býsna vel með lekamálinu og þykist hafa heyrt þessar setningar býsna oft af munni innanríkisráðherra:

„Ég hef sagt allt sem ég veit. Ég get ekki upplýst meira, því að ég veit það ekki. Ég hef upplýst allt.“

Núna virðist hún hins vegar búa yfir „allskyns“ upplýsingum sem enginn hefur heyrt af og þær voru svo mikilsverðar að viðstöddum var beinlínis brugðið.

Hvað er það sem innanríkisráðherra hefur ekki sagt okkur? Hvað getur hún sagt þingflokki Sjálfstæðisflokksins svo alvarlegt, sem hún hefur ekki sagt þinginu eða bara óbreyttum almenningi?

Við hljótum að treysta því, að stjórnskipunar- og eftirlitsnefnd alþingis spyrji ráðherrann spjörunum úr þegar hún kemur á fund nefndarinnar.

Og vona um leið að nefndarmenn bresti ekki bókstaflega í grát yfir þessum dramatísku afhjúpunum.