Messíasarkomplex

 

Það er til aldagömul upplifun sem er nefnd messíasarkomplex í sálfræðinni. Hún lýsir sér í sjálfumglaðri sjálfsmynd einstaklings sem í bjargfastri trú setur fram einhvern sannleik sem öllum öðrum er hulinn. Trú á að hann og enginn annar geti bjargað tiltekinni þjóð frá glötun. Þetta er skylt upprisuheilkenninu sem birtist í endurkomu frelsarans.

 

Sigmundur Davíð birtist þjóðinni í síðustu kosningabaráttu og tjáði henni að valið stæði á milli Verðtryggingarstjórnar eða Framsóknarstjórnar. Hans fyrsta verk yrði að afnema verðtrygginguna kæmist hann til valda.

 

Val kjósenda snérist um hvort hann fengi völd til þess að ráðast gegn erlendum hrægömmum sem hefðu hrifsað til sín lífsbjörgina frá íslenskri þjóð. Ná 380 milljörðum af þessum erlendu skúrkum og skila þeim til þjóðarinnar í heilagri „Leiðréttingu”

 

Kæmist hann til valda myndi hann sjá til þess að fram færi vitræn umræða um gjaldmiðilsmál og tengsl við okkar helstu viðskiptaþjóðir. Þjóðin fengi síðan að velja í þjóðaratkvæðagreiðslu á milli hvort samningaviðræðum við þær yrði lokið.

 

Í dag kvartar Sigmundar Davíð undan bullinu í stjórnandastöðunni og sýnir þingeim fullkomna lítilsvirðingu með því að rjúka á dyr í hvert sinn sem fram koma fyrirspurnir sem honum finnast óþægilegar.

 

Okkur enn í fersku minni verklagið þegar hann var í forystu stjórnandstöðunnar. Þá voru skipulagðar endalausar staglræður um ekkert og síðan bjálfaleg andsvör. Ef stjórnaliðar voru í púltinu þá gullu við barnalegar upphrópanir og frammíköll.

 

Hver einasti fréttatími hófst á glefsum frá Alþingi þar sem stjórnarandstaðan hagaði sér eins krakkar í skólaportinu í frímínútum. Álit þjóðarinnar á störfum Alþingis féll á skömmum tíma niður í eins stafs tölu.

 

Stjórnarandastaða Sigmundar Davíðs hagaði sér af fullkomnu ábyrgðarleysi, eins og óþroskaðir unglingar á ræðunámskeiði. Búin var til veruleiki sem engin kannaðist við..

 

Í hverri ræðunni á fætur annarri var staglast á fullyrðingar um lausnir sem stóðust enga skoðun. Stjórnarandastaðan stæði að „einstaklega málefnalegri umræðu.“ Ávalt fylgdu skipulögð andsvör sem hófust undantekningalaust á þessum orðum; „Ég vil þakka háttvirtum þingmanni fyrir einstaklega góða og efnisríka ræðu.“

 

Purkunarlaust beitti stjórnarandstaða Sigmundar Davíðs ofbeldi til þess að koma í veg fyrir að mál sem þeir eru ósammála og kæmust í gegn.

 

Síðustu tvö kjörtímabil hafa orðið til þess að álit Alþings samsamar sig við gömlu Löduna sem liggur í túnfætinum og riðgar niður