Jón Daníelsson 26/06/2015

Loksins eitthvað af viti

LandspitalakostnaðurEftir áratuga argaþras um Reykjavíkurflugvöll fæddist í gær plagg, sem virðist fela í sér vitræna niðurstöðu. Að því einu tilskildu að athuganir, sem vonandi verða gerðar í vetur, samræmist því sem þegar er vitað, ætti öllum að mega vera ljóst að Hvassahraun er heppileg lausn.

Á þessari lausn er sá galli, að þaðan tekur lengri tíma að koma sjúklingum úr sjúkraflugi á sjúkrahús. Hörðustu fylgismenn flugvallar í Vatnsmýri eru að sjálfsögðu þegar búnir að grípa þetta á lofti.

Hér gleymist þó, að staðsetning nýs Landsspítala við Hringbraut er síður en svo óumdeild. Vífilsstaðir hafa verið nefndir meðal hugmynda um aðra staðsetningu. Og fyrst svo vill til að við þurfum bæði nýjan flugvöll og nýtt aðalsjúkrahús á sama tíma, er í ágætu lagi að rísa upp úr stólunum, horfa í kringum sig og skoða valkostina.

Aksturstími sjúkrabíla frá flugvelli í Hvassahrauni að sjúkrahúsi á Vífilsstöðum, yrði trúlega svipaður þeim tíma sem nú tekur að flytja sjúklinga úr Vatnsmýri á Hringbraut eða í Fossvog. Þessari staðsetningu flugvallar og spítala fylgja líka aðrir stórir kostir. Umfram allt er nóg landrými á báðum stöðum og þess vegna unnt að stækka og bæta við eftir þörfum a.m.k. út þessa öld og jafnvel lengur.

Á hinn bóginn er olnbogarými í grennd við miðborgina eiginlega ekki neitt. En með því að flytja þaðan bæði flugvöll og sjúkrahús, losnar verðmætasta byggingarland á Íslandi. Það er jafnvel ekki fjarstætt að hugsa sér að með sölu eða leigu lóða á þessu svæði mætti fara langt með að fjármagna bæði nýjan spítala og nýjan flugvöll.

Að því leyti virðast þetta vera eins konar „win-win“ aðstæður.

Þetta setur byggingu nýs spítala í dálitla biðstöðu. Og það er svo sem ekki gott. Framkvæmdir hefðu átt að vera hafnar fyrir löngu.

En staðreyndin er sú, að þær eru ekki hafnar og þess vegna er kannski upplagt að grípa þetta tækifæri. Skipulag á Vífilstaðasvæðinu ætti að geta verið tilbúið eftir svo sem ár og teikningar að fyrstu áföngum ekki löngu síðar. Ef menn láta hendur standa fram úr ermum.

Til þess þurfa stjórnmálamenn þó að rífa sig upp úr skotgröfunum og leggja sig fram um að ná skynsamlegustu niðurstöðu í sátt og samlyndi. Meira þarf ekki til – en það virðist þó til allt of mikils ætlast.

– – –

Mynd: Þessi tafla er unnin á vegum Samtaka um betri spítala og útreikningarnir yfirfarnir af KPMG. Vífilsstaðir eru ekki valkostur hér, heldur Elliðavogur, en það skiptir ekki meginmáli. Myndin er hér tekin af vef Viðskiptablaðsins. Smellið til að stækka.

Jón Daníelsson
Flokkun : Efst á baugi, Pistlar
0,778