Leynipartí kúlulánaþjófanna

Það er skítadjobb að vera blaðamaður á vakt að kvöldi laugardags fyrir hvítasunnudag. En það þarf að víst að fá sína netsmelli.

Í því skyni bauð DV okkur upp á fyrirsögnina „Afmæli í anda 2007: Leyniveisla í Viðey.“ Fréttin var skrifuð upp úr kvöldmat.

Þið getið lesið fréttina (það fjölgar smellunum enn), en í fyrirsögninni eru tvö athyglisverð hugtök. Skoðum fyrst leyndina.

Hvaðanæva úr Reykjavík fór ekki framhjá neinum sem gaut augum út á sundin í vikunni að þar hafði verið slegið upp risastóru tjaldi vestan við Viðeyjarstofu. Þeir sem ég hitti voru á því að þetta væri líklega nýja sirkustjaldið, það er þesslegt og enginn hafði séð það áður.

Leyniafmælið var sumsé svona mikið leyndó.

Raunverulega skýringin á „leyndinni“ skín samt í gegn í fréttinni: Blaðamaðurinn hafði hringt út um allan bæ til að komast að því hver ætti afmæli, en ekki tekizt það. Honum líður ekki vel. Hann þekkir engan í ammælinu og að því er virðist engan sem þekkir neinn sem þekkir neinn sem var boðið. Eftir öll þessi símtöl. Hann er alveg grautfúll. Og ákveður því að kalla þetta leyniveizlu.

Þetta er í alvörunni skítadjobb.

Hitt hugtakið er skemmtilegra, „í anda 2007.“ Hvað merkir það eiginlega? Og hvað hefur blaðamaðurinn fyrir sér?

Er svo dýrt að leigja sirkustjaldið, koma þar fyrir borðum og stólum, fá hljómsveit og vonandi líka kaupa einhvern mat og drykk fyrir gesti að það sé einungis á færi tortólubófa? Hvursu margar viðlíka veizlur ætli séu haldnar víða um land um hverja helgi? Einkum að sumri til?

Tók fólkið kannske lán fyrir öllu saman? Kúlulán? Með engu veði nema máske í tómum bjór- og vínflöskum?

Er fólk að bryðja gull þarna úti í eyju? Veit blaðamaðurinn það? Neinei. Ekki frekar en hitt. Og hefur enga ástæðu til að ætla það.

Hvað er frasinn „í anda 2007“ annað en merkingarlaust slaður þess sem dettur ekkert skárra í hug? Af því að hann veit ekkert um það sem hann er að skrifa frétt um, en þarf að búa eitthvað til?

Líklega er rétt að taka fram, að ég veit heldur ekkert um þetta afmæli, annað en að tjaldið er þarna, eins og flestir Reykvíkingar með sæmilegri meðvitund. En Viðey er dásamlegur staður og rétt að óska öllum hlutaðeigandi til hamingju með að nú er bezti dagur ársins hingað til í veðurfari, en ekki suðvestanlægðarskítadrullurok og -rigning.

Af sömu sökum er einmitt og því miður ekki viðeigandi að óska blaðamanni DV til hamingju með djobbið sitt.