Guðmundur Gunnarsson 18/12/2015

Lágkúra formanns fjárlaganefndar

 

mynd„Við í fjárlaganefnd lýsum ábyrgð á hendur verkalýðshreyfingarinnar yfir því hversu lág launin eru hér í landinu. Það er forystu verkalýðshreyfingarinnar að kenna að hér á landi eru um 10% vinnufærra manna skráðir öryrkjar“ segir formaður fjárlaganefndar í umræðum á Alþingi og var aðalfréttin núna áðan (RÚV kl. 16:02 18.12.15).

 

Hér lýsa umræddir fjárlagaþingmenn enn einu sinni yfir yfirburða vanþekkingu á því sem þeir eru að tala um, eða þá einbeittan vilja til þess tala gegn betri vitund og hreint út sagt ljúga vísvitandi að þjóðinni.

 

Semja verkalýðsfélögin við sjálf sig um kaup og kjör?

 

Það hafa í nokkur ár legið fyrir Alþingi mjög ítarlegar skýrslur frá svokölluðum bótanefndum þar sem hefur verið bent á hvað þurfi að gera til þess að vinna á þessum vanda. Ástæða er að halda því til haga að það eru þingmenn sem setja lög og reglugerðir þessa kerfis. Þetta bótakerfi sem þingmenn hafa búið til virkar þannig að það sektar öryrkja með 100% jaðarskatti sýni þeir minnsta vilja til þess að minnka örorkuhlutfallið niður fyrir 75%. Tillögum um breytingar á þessu hafa þingmenn ætíð hafnað. Þar hafa farið fremstir í flokki þingmenn Sjálfstæðis- og Framsóknarflokka.

 

Hvað varðar launin, þá eru nú ekki liðnar margar vikur síðan Vigdís Hauksdóttir ásamt öðrum stjórnarþingmönnum ásamt forsætis- og fjármálaráðherrum fóru hamförum gegn kröfugerðum verkalýðsfélagana og báru þungar sakir á samninganefndarmenn verkalýðsins. Eins og t.d. að hér væri sýnt fullkomið ábyrgðarleysi. Samningamenn verkalýðsfélaganna væru á snærum Samfylkingar og tilgangurinn væri sá einn að eyðileggja glæsilegt uppbyggingarstarf ríkisstjórnarinnar. Verklýðsfélögin væri nýtt til að því setja landið á hausinn, skapa aukið atvinnuleysi, skapa aðra kollsteypu, setja nýtt heimsmet í verðbólgu og þannig mætti lengi telja.

 

Öll þekkjum við þessar yfirlýsingar stjórnarþingmanna. Það er síðan aldeilis ótrúleg lágkúra þegar sömu þingmenn mæta í fjölmiðla og „Vilja lýsa yfir ábyrgð á hendur verkalýðsfélaganna yfir því hversu lág launin eru í landinu.“ Þetta er reyndar vel þekkt ferli.

 

Í hvert einasta skipti sem verkalýðsfélögin setja fram sínar kröfur fara þáverandi stjórnarþingmenn úr böndunum, mæta í alla fréttatíma og spjallþætti hrópandi um ábyrgðarleysi, veruleikafyrringu og kröfuhörku verkalýðsins.

 

En daginn eftir að búið er afgreiða kjarasamninga í kosningum, þá snúa þingmenn við blaðinu.

Flokkun : Efst á baugi
1,746