Lag eftir smekklausan og talsvert seinfæran hálfbróður Mozarts á enga möguleika. Sérfræðingar Herðubreiðar vita lengra nefi sínu

Sérfræðingar Herðubreiðar um fótbolta eru sannfærðir um úrslit í leikjum dagsins á HM. Til dæmis er morgunljóst að Úrúgvæ nær ekki lengra í keppninni.

Sigtryggur Magnason færir fram skýr og einföld rök:

„Ég drekk stundum kaffi sem er ættað frá Kolumbíu. Aldrei frá Uruguay. Kolumbía vinnur því með tveimur mörkum gegn engu.

Ég hef aldrei farið í chileanskt vax. Brasilía vinnur með fjörum mörkum gegn einu.“

Ingunn Snædal er líka mjög sannfærandi: „Þetta er ekki tiltakanlega flókið. Kólumbía vinnur á móti Uruguay af því að: Gabriel Garcia Marquez. Sömuleiðis ber Chile sigurorð af Brasilíu vegna Pablo Neruda. Auk hins dásamlega Roberto Bolano sem var flækingur, uppvaskari, ruslakarl og fáránlega góður rithöfundur. Chile og Kólumbía eiga bæði sterka bókmenntahefð (og ótrúlega fjölbreytni í flóru og fánu – það er eitthvað!). Brasilíumenn eiga Paulo Coelho sem hefur aldrei skrifað góða bók. Brasilíumenn eigna sér sömbuna en Kólumbíumenn eiga Shakiru OG Sofiu Vergara. Döh.

Auk þess sem Brasilía og Uruguay eru í laginu eins og tyggjóklessur, en Kólumbía minnir á ninja-stjörnu og Chile er samúræjasverð. Þarf að útlista þetta eitthvað frekar?“

Þorgeir Tryggvason vísar til tónlistarhefðar: „Brasilíumenn vinna á heimavelli í dag Og þá meina ég að sjálfsögðu heimavelli brasilískrar tónlistar, Belo Horizonte. Þar ólust þeir upp, Cavalerabræðurnir Max og Igor, sem árið 1984 stofnuðu þar eina merkustu metalsveit sögunnar, Sepultura. Bandið sótti á tímabili innblástur í tónlist frumbyggja Brasilíu til viðbótar við pönkið og þrassið, og þessi bætiefnablanda mun skila brasilískum sigri. Gott ef annar Belo Horizontedrengur, hann Fred, nær ekki loks að yfirskyggja hann þarna hvað hann heitir aftur. Limahl?

Þjóðsöngur Úrúgvæ hljómar eins og forleikur að einhverju. Kannski óperu eftir verulega smekklausan og talsvert seinfæran hálfbróður Mozarts. Svo er hann víst sá lengsti í heimi. Þjóðsöngurinn, ekki bróðir Mozarts. Kólumbíumenn sofna undir honum og tapa.“

Eiríkur Jónsson er viss í sinni sök: „Brasilía er ofmetnasta lið keppninnar, lifandi goðsögn og það gildir það sama um lið og persónur þegar þær verða goðsagnir í lifanda lífi – þær hætta að skapa en hugga sig við fagnaðarlæti gamalla aðdáenda – þess vegna vinnur Síle – þar eru menn ferskir.

Kólumbía og Úrugvæ liggur líka ljóst fyrir. Suarez er ekki með Úrugvæ en hann er maðurinn sem unnið hefur sigra liðsins snöggt og bítandi og skorar yfirleitt fyrr en skellur í tönnum – þess vegna vinnur Kólumbía.“

Kolbeinn Óttarsson Proppé telur þjóðfélagslegar aðstæður ráða úrslitum: „Brasilía 3 – 2 Síle. Það minnsta sem við getum gert er að vonast til að Brassarnir vinni þetta mót, svo þeir heimilislausu sem skóflað var í burtu vegna HM-framkvæmda og þeir fátæku sem ekki fá aðstoð vegna skrilljónanna sem fóru í mannvirkin geti þó ornað sér við sigur. Hver þarf mat og húsaskjól þegar landsliðið vinnur HM?

Úrúgvæ  1 – 2 Kólumbía. Það er ekki hægt að halda með þjóð sem gerir skotárásir á blaðamenn sem eru að rannsaka rauð spjöld fortíðarinnar hjá þeirra besta leikmanni, nokkuð sem gerðist á dögunum í Úrúgvæ. Þar er spillingin í fótboltanum landlæg og því mun ég styðja þá vöggu lýðræðis, skýrra stjórnarhátta, gegnsæis í opinberri stjórnsýslu og glæpaleysis sem Kólumbía er.“