Karl Th. Birgisson 05/09/2014

Kaffi og sígó

Kaffi og sígó

Vefmiðlarnir eru dásamleg uppfinning. Allar þessar fréttir og upplýsingar, daginn út og inn. Ókeypis líka. Það er hreint ótrúlegt.

Eiginlega of ótrúlegt til að vera satt. Sem það er.

Vefmiðlarnir eru ekkert ókeypis. Það eru auglýsendur sem borga fyrir þá. Og kostnaðurinn við auglýsingarnar kemur fram í vöruverði til okkar, neytenda. Við borgum alltaf að lokum.

Það er samt bara fínt, og eins og það á að vera. Frjáls viðskipti í frjálsu samfélagi. Og vefmiðlarnir eru dásamleg uppfinning.

Við höfum samt vanizt þeirri hugsun, þessi kannske fimmtán ár sem vefurinn hefur orðið alvöruhluti af daglegu lífi okkar: Allt er ókeypis. Það er eins sjálfsagt og að vatn rennur úr krananum.

Þegar þarf að borga – til dæmis fyrir kvikmyndir eða tónlist – hefur verið fundin leið til þess að stela efninu. Heil kynslóð elst nú upp sem finnst alltílæ að stela vinnu annarra. Þau kalla það bara að dánlóda. Það er þægilegra orð í munni.

Og hvert er ég nú að fara með þessi augljósu sannindi?

Hingað:

Frá og með næsta pistli mínum þarf að borga fyrir lesturinn.

Jebbs og jesssörríbob.

Að baki liggur ekki flókin hagfræði. Það kostar alls konar að gefa út Herðubreið, einkum vinnu, en líka hýsingar-, viðhalds- og annan kostnað sem ég kann ekki einu sinni íslenzk orð yfir. Og þótt lesturinn sé ævintýralega mikill munu auglýsingar seint dekka þau útgjöld.

Er þá ekki rétt að hætta þessu? heyri ég nú einhvern hagfræðinginn spyrja. Neei, er svarið. Við vitum að lesendur kunna að meta efnið – það sýnir lesturinn. Hví að svíkja þá um það, ef önnur leið er til?

Og því erum við nú stödd hér: Næst þegar þú lest Óumbeðnar athugasemdir kostar það 290 krónur á mánuði. Allt annað efni í Herðubreið verður „ókeypis“ eins og hingað til. Það er bara þessi gaur hérna sem þarf að borga fyrir.

Hann kostar á við hálft normalbrauð í mánuði. Eða hálfa ferð í sund.

Sumum vinum mínum finnst þetta alltof ódýrt, en við erum ekki þurftafrek.

Markmiðið er að ég eigi fyrir Viceroy og vefstjórinn fyrir kaffi.

Það finnst mér góður díll.

Viceroy er dásamlegt tóbak.

1,228