Í Hljómskálagarðinum 17. júní

Eftir Halldóru B. Björnsson

Í sólskini dagsins er gengið um garðinn

sem grær svo illa

að afreksmenn vorir

orðnir að steini

eru ekki vallgrónir enn.

 

Fótstalli geng ég framhjá og les:

Bertel Thorvaldsen

mestur listasmiður Norðurlanda

að faðerni kominn

af gömlum íslenskum ættum.

 

Svo ört bar mig hjá

að ekki varð lesið

hvað aftan á steininum var.

Mundi eitthvað um móðurættina

meitlað þar?

 

Halldóra B. Björnsson (1907-1968)