Hvaða synd?

Eftir Úlfar Þormóðsson

Þó að ég fylgist ekki stöðugt með því sem fram fer í útvarpinu hef ég það opið öllum stundum. Það er í öðru herbergi ég, en ómeðvitað sperri ég eyrun þegar eitthvað úr því nær til mín. Þegar ég heyrði gamalkunnugt stef, „ … að gera Jesú Krist að leiðtoga lífs þíns“ lagði ég eyrun að. Þetta er síðari hluti spurningar sem lögð er fyrir þrettán til fjórtán ára gömul börn áður en þau eru fermd, staðfest gjöf til guðs. Ég man ekki betur en að spurningin hefjist á orðunum viltu leitast við …

Ég fór til og hækkaði í útvarpinu um leið og stúlkurödd játti þessu. Í kjölfarið hljómaði talkór barna sem kvaðst vera syndum hlaðinn og ég gat ekki betur heyrt en svo hefði verið með blessuð börnin allt frá fæðingu þeirra og að þetta óefni myndi engan enda taka nema guð almáttugur og Kristur tækju í taumana og leiðbeindu syndurunum.

Þá vöknuðu þessar spurningar:

Er það virkilega svo að kirkjan sé enn að hræða unglinga til fylgilags við sig með syndinni, kenni þeim að þeir séu fæddir í synd og muni tortímast í heitasta helvíti ef þeir gera Jesú Krist ekki að leiðtoga lífs síns? Getur verið að vígðir menn séu enn að tala um það sem gyðingarnir kenndu um syndina sem átti að hafa sprottið fram þegar Eva át ávöxt af skilningstrénu í Edensgarði forðum tíð?

Eða hvaða synd er þetta eiginlega sem prestar á launaskrá hjá mér og þér eru að hrella börnin okkar með?

Er ekki hægt að fara fram á að þeir svari þessu opinberlega, mennirnir, nýbúnir að fá útborgað úr ríkissjóði?