Hvað breyttist eiginlega á 30 árum?

Fyrir nánast alveg sléttum 30 árum var ég blaðamaður á NT og ákvað einu sinni að forvitnast um það, hversu mikið maður fengi að borða fyrir þær krónur sem Félagsmálastofnun Reykjavíkurborgar áætlaði skjólstæðingum sínum í mat.

Það var gaman að vinna á NT og við gerðum ýmislegt öðruvísi en hefðin bauð. Þess vegna stillti ég bæði sjálfum mér og helstu niðurstöðunum upp á þessa mynd. Innkaupin voru gerð í matvöruverslun sem þá var í Síðumúlanum og með aðstoð kaupmannsins. Mig minnir reyndar að hann hafi gefið mér afslátt, sem samsvaraði því að ég hefði keypt allt saman í stærri og hagkvæmari pakkingum.

Þrjátíu árum seinna er kannski ekki úr vegi að rifja upp matseðil þessa dags.

Morgunmatur: Ein brauðsneið með smjöri. Engir peningar fyrir áleggi. En tebolla fékk ég.

Hádegismatur: Tvær kjötbollur og ein kartafla. Mjólkurglas með.

Síðdegiskaffi: Tvær brauðsneiðar með smjöri. Tebolli með.

Kvöldmatur: Eitt egg, lítil skyrdós og mjólkurglas.

Alls mátti maturinn kosta 50 krónur á dag, en dýrasta máltíðin þennan daginn var hádegismaturinn, sem kostaði 23 krónur og 20 aura. Á vef Hagstofunnar sé ég að neysluvísitalan hefur rétt tæplega tífaldast, þannig að núvirðið gæti verið nálægt 230 krónum fyrir þessa sælkeramáltíð. Þetta var auðvitað ekki hávísindalegt, en samt ekkert alveg út í bláinn.

Og það má líka nefna að samkvæmt heimasíðu velferðarsvið Reykjavíkurborgar, er löngu búið að umhverfa þessu kerfi. En svona í fljótu bragði sá ég þar hvergi beina áætlun um matarkostnað.

En þegar fólk er nú að fleygja á milli sín tölum á borð við 248 krónur fyrir máltíðina, veltir maður óneitanlega fyrir sér á hvað vegferð við höfum eiginlega verið þessi 30 ár.

Ef einhvern langar að skoða sig aðeins betur um á árinu 1984, fann ég þessa úttekt mína eftir nokkra leit á timarit.is. Nánar tiltekið í NT þann 6 september á bls. 8-9.

En af matnum á borðinu er það að segja að hann hvarf allur ofan í mig á skammri stundu og mig minnir að úr þessum dagsskammti hafi orðið bara sæmilegasta máltíð.