Guðni át sig sjálfur

Aðeins ein skýring hefur komið fram á sinnaskiptum Guðna Ágústssonar. Hún er sú, að „umræðan“ hafi verið svo harkaleg að Guðni og fjölskyldan hafi hrokkið undan.

Framsóknarvaktin talar jafnvel um „netskrímslið“ sem hafi étið Guðna og éti á endanum alla.

Gott og vel. Má vera að rétt sé. Ugglaust hafa einhverjir ekki kunnað sér hóf eða mannasiði í ummælum.

En hér er hlutunum samt snúið á hvolf. Umræða sprettur ekki af sjálfri sér og hún kviknaði af ærnu tilefni í þessu tilviki. Fram kom einfaldlega órækur vitnisburður um að í hugmyndaheimi Guðna teljist kvenfyrirlitning og hómófóbía sjálfsagðir hlutir, og boðlegir á opinberum vettvangi ef þeir eru klæddir í búning svokallaðra gamanmála.

Af þessu spruttu viðbrögðin og sum harkaleg eftir efninu. Þau eru þó ekki „umræðunni“ að kenna, heldur eru á ábyrgð þess sem gaf tilefnið.

Að því sögðu verður að segja hitt líka, að tiltekin viðhorf eða skoðanir á ekki að „banna“ eða útskúfa þeim sem láta þau í ljós. Guðna er alveg frjálst að segja alla þá brandara sem hann hefur smekk til og samhlæjendur mega taka undir.

Aðrir hafa hins vegar líka fullan rétt til að lýsa andúð sinni og óbeit á tilteknum viðhorfum. Í þessu tilviki voru þeir fjölmargir og það segir einhverja sögu, að enginn hefur orðið til þess að verja smekkleysuna í Guðna.

Það segir líka einhverja sögu um Framsóknarflokkinn að honum þætti barasta stórgott að fá í framboð svo eindreginn talsmann þessara viðhorfa.

Vonandi fær Framsóknarflokkurinn nú í framboð fulltrúa annars hugmyndaheims en þess sem Guðni byggir. Viðkomandi verður metinn af málflutningi sínum, en það mun ekkert „netskrímsli“ éta hann.

Netskrímslið át heldur ekki Guðna. Hann er ekki fórnarlamb. Hann át sig sjálfur.