Fyrrverandi biðst næstum því afsökunar

Morgunblaðið biðst afsökunar á Reykjavíkurbréfi ritstjórans. Það eitt og sér hlýtur að teljast vera frétt. Reykjavíkurbréfið moggans er ekki bara bara eins og hver annar bréfstúfur, heldur flaggskip blaðsins, kjölfesta þess, rá og reiði í senn. Mér vitanlega hefur blaðið aldrei beðist afsökunar á þessum bréfum sínum.

Reykjavíkurbréfið er nú sem endranær skrifað af ritstjóra blaðsins. Hann er fyrrverandi formaður sjálfstæðisflokksins, fyrrverandi borgarstjóri í Reykjavík, fyrrverandi forsætis- og utanríkisráðherra og fyrrverandi bankastjóri Seðlabanka Íslands. Hann er mikið fyrrverandi.

En það er ekki ritstjórinn sem biðst afsökunar á Reykjavíkurbréfinu. Það er mogginn sem gerir það. Fyrirtækið sjálft. Eigendur og starfsfólk moggans þá væntanlega.

Þetta er samt að öllum líkindum næst því sem kalla má afsökunarbeiðni af hálfu Davíðs Oddssonar. Hafa þó næg tilefni verið til þess af hans hálfu og flest hver alvarlegri en dellu-skrif í moggann.

Það verður að geta þess sem vel er gert.