Framsóknarmenn sjá ljósið

 

Þessa dagana er engu líkara en ýmsir þingmenn Framsóknarflokksins séu að átta sig á því, að það er ekki nóg að eiga aðild að ríkisstjórn, hafa forsætisráðherra úr eigin röðum og hafa komið fram helsta kosningamáli sínu, ef samstarfsflokkurinn á svo að fá að ráða öllu öðru.

Það er fyrirhuguð hækkun matarskattsins, sem nú klípur framsóknarþingmennina svo harkalega í rassinn, að þeir finna til. Aukin skattlagning brýnustu lífsnauðsynja þykir frjálshyggjumönnum fullkomlega eðlileg, en bæði frjálslyndir miðjumenn og vinstrisinnar eru einfaldlega á allt annarri skoðun.

Framsóknarflokkurinn þjappaðist æ þéttar upp að Sjálfstæðisflokknum á síðasta kjörtímabili, en það sem þá sameinaði flokkana var umfram allt sú staðreynd að báðir voru í stjórnarandstöðu. Málefnasamstaða átti þar ekki endilega stóran hlut að máli.

Enda er Framsóknarflokkurinn ekki frjálshyggjuflokkur.

Og það eru fleiri ljóstýrur að kvikna fyrir augum framsóknarþingmannanna þessa dagana. Það virðist líka vera að renna upp fyrir þeim, að það er engin goðgá að skattleggja ferðamenn. Þvert á móti er ferðamannastraumurinn að verða okkur ofviða og þess vegna má beinlínis líta á það sem vel brúklegt stjórntæki, að gera Íslandsferðirnar nokkru dýrari.

Ástandið á Alþingi síðustu ár vinstri stjórnarinnar var auðvitað skelfilegt. Stjórnarandstaðan setti sig upp á móti nánast hverju einasta máli og allt var tafið eins og mögulegt var. Þingið var varla starfhæft. Því miður misstu margir framsóknarmenn sig alveg upp að Sjálfstæðisflokknum í þessari hringavitleysu.

En nú virðast framsóknarþingmennirnir vera að ná áttum. Það er gott. Þótt Sjálfstæðisflokkurinn hafi ráðið mestu á Íslandi allan lýðveldistímann, hefur hann aldrei stjórnað einn. Það hefur alltaf einhver haldið í skottið á honum.

Nú er það hlutverk framsóknarþingmanna að koma í veg fyrir hækkun matarskattsins. Og helst að hækka skatta á ferðamenn í staðinn. Þeir þurfa aðallega að passa sig á fagurgalanum um „mótvægisaðgerðir“. Hækkun húsnæðis- og barnabóta gagnast fólki misjafnlega, en hitt skiptir þó ekki minna máli, að slíkar hækkanir eru fljótar að brenna upp í verðbólgunni, sem margt bendir til að muni taka við sér fljótlega.

Það er nefnilega bara eitt sem vegur upp á móti hækkun matarskatts. Og það er jafn mikil lækkun matarskatts.

Ef í harðbakkann slær er vandalaust að mynda ríkisstjórn án Sjálfstæðisflokksins. Og völdin eru sjálfstæðismönnum dýrmætari en allir matarskattar og ferðamannaskattar til samans.

Framsóknarþingmenn þurfa ekkert að óttast í þeim efnum.