Jón Daníelsson 14/05/2014

Frá örbirgð til allsnægta í 15 skrefum

Ég er allt í einu búinn að fatta hvernig hægt er að græða 3,8 milljarða í 15 einföldum skrefum og með lítilli fyrirhöfn. Ekki nema sjálfsagt að miðla þessari uppgötvun til annarra.

Skref 1: Ég stofna fyrirtækið Pons ehf (stytting fyrir Pínu pons).

Skref 2: Ég læt Pons ehf kaupa hlutabréf í fyrirtækinu Aurasál Holding, sem kunningi minn er hálfnaður að setja á hausinn. Ég lofa að borga honum einn milljarð fyrir þessi hlutabréf við fyrstu hentugleika.

Skref 3: Ég læt Pons ehf stofna dótturfyrirtækið PS38 (38 er stytting fyrir 3,8 milljarða).

Skref 4: Ég læt dótturfyrirtækið PS38 kaupa hlutabréfin í Aurasál Holding af Pons fyrir 6 milljarða og lofa að borga sjálfum mér (fyrir hönd Pons) þessa 6 milljarða (fyrir hönd PS38) við fyrstu hentugleika.

Skref 5: Ég fer í bankann og slæ 6 milljarða lán fyrir hönd PS38 til að borga Pons fyrir hlutabréfin í Aurasál Holding og er svo rausnarlegur við bankann að láta hann hafa öll hlutabréfin að veði.

Skref 6: Ég legg alla 6 milljarðana samviskusamlega inn á bankareikning PS38.

Skref 7: Ég millifæri peningana af reikningi PS38 yfir á reikning Pons. Þar með hefur dótturfélagið greitt skuld sína við móðurfélagið.

Skref 8: Ég millifæri 1 milljarð af reikningi Pons til kunningja míns, eiganda Aurasálar Holding. Þar með er skuldin við hann greidd.

Skref 9: Ég skila skattayfirvöldum ársreikningi fyrir Pons ehf. Tekjur voru 6 milljarðar, gjöld 1 milljarður og hagnaður því 5 milljarðar.

Skref 10: Seim einkaeigandi Pons ehf, greiði ég mér allan hagnaðinn, 5 milljarða í arð.

Skref 11: Ég greiði ríkinu skilvíslega 20% fjármagnstekjuskatt (1 milljarð) af arðinum.

Skref 12: Ég stofna bankareikning á Tortólu og legg þar inn þá 4 milljarða sem eftir eru.

Skref 13: Ég fer á Kvíabryggju til hálfs árs dvalar og greiði lögmönnum mínum 200 milljónir.

Skref 14: Ég stunda heilsubótargöngur vestur á Snæfellsnesi og það rennur upp fyrir mér að slíka heilsubót hef ég vanrækt allt of lengi.

Skref 15: Ég bið konuna mína að sauma stærri rassvasa á buxurnar mínar og fer í bissness með 3,8 milljarðana.

Jón Daníelsson
Flokkun : Pistlar
0,727