Karl Th. Birgisson 21/04/2014

Fögnum framboði Guðna

Þveröfugt við það Egill Helgason heldur (af miklu hugmyndaflugi sínu) tel ég enga ástæðu til að óttast það, að Guðni Ágústsson vill nú setjast í borgarstjórn Reykjavíkur.

(Því að það ætlar hann að gera. Menn tilkynna ekki að þeir ætli að tilkynna á sumardaginn fyrsta að þeir ætli ekki í framboð.)

Ég hef að vísu heldur enga ástæðu til að ætla að hann eigi þangað nokkurt erindi og vildi gjarna að þar væri yngra fólk með ferskari hugmyndaheim og víðfeðmara útsýni. En Guðni hefur ósköp fá tækifæri til að gera neitt af sér í borgarstjórn (ólíkt ráðherraembætti) og líklegt er að honum muni þykja vistin heldur daufleg. Það eitt mælir með framboði hans.

Ég geri ráð fyrir að Guðni byggi kosningabaráttu sína á tvennu: Að flugvöllurinn skuli vera á sínum stað og að Reykjavík eigi ekki að ganga í Evrópusambandið. Hvort tveggja mun fleyta honum inn í borgarstjórn og við það er einn stór kostur:

Guðni verður skaðminni fyrir neytendur og skattgreiðendur þar en í núverandi starfi sínu sem framkvæmdastjóri Samtaka afurðastöðva og mjólkurframleiðenda. Það gleymist nefnilega í öllu hjalinu um hvað hann er nú skemmtilegur og sérstakur hann Guðni, að hann hefur árum saman stundað harða gæzlu sérhagsmuna sem neytendur borga fyrir morð fjár alla daga ársins.

En þar er líka hugsanlegur veikleiki Guðna. Samkvæmt mínum heimildum verður á næstu vikum birtur enn einn úrskurður Samkeppnisstofnunar um samkeppnislagabrot Mjólkursamsölunnar með tilheyrandi risasektum. Guðni getur ekki skotið sér undan ábyrgð í því máli, þótt hann reyni það vitanlega eins og alltaf.

Með þeim fréttum rifjast upp hvaða tjóni Guðni hefur valdið öllum almenningi, og viðbrögð reykvískra kjósenda geta orðið tvenns konar: Að hafna honum. Eða hitt, sem er líklega skynsamlegra, að finna honum gluggalausa skrifstofu í borgarapparatinu og láta hann dúsa þar í refsingarskyni.

Það verður ódýrara fyrir alla þegar upp er staðið.

1,708