Björn Valur Gíslason 23/04/2014

Enn lækkar veiðigjaldið

Eitt af fyrstu verkum ríkisstjórnar sjálfstæðis- og framsóknarflokks eftir að hún tók við völdum var að lækka veiðigjöld í sjávarútvegi um 4 milljarða króna. Nú leggur ríkisstjórnin til að gjöldin lækki enn frekar eða um 2,8 milljarða króna á ári, þrátt fyrir met afkomu í greininni.

Nái það fram að ganga hefur ríkisstjórninni tekist á innan við ári að lækka árlegar tekjur af veiðigjöldum um tæpa 7 milljarða. Viðbótarlækkuninni verður eins og þeirri fyrri mætt með auknum niðurskurði.

Í stuttu máli fjallar nýtt frumvarp um lækkun veiðigjalda um eftirfarandi:

  • Frumvarpið byggir á tillögum sem unnar eru af endurskoðunarfyrirtækinu Deloitte sem hefur lengi starfað á vegum LÍÚ (bls. 5).
  • Tekjur af veiðigjöldum munu lækka um 2,8 milljarða til viðbótar fyrri lækkun.
  • Horfið er frá auðlindagjaldi sem tekur mið af afkomu af nýtingu auðlindarinnar. Í stað þess verður veiðigjaldið föst krónutala á hverja fisktegund, að teknu tilliti til úthaldsdaga, aflamagni og verðmæti einstakra tegunda.
  • Að teknu tilliti til afsláttar verður samanlagt gjald (fast gjald + sérstakt gjald) á margar fisktegundir lægra en grunngjaldið á þorskígildi er í dag (kr. 9,50 pr/ígildi) nái frumvarpið fram að ganga.
  • Samkvæmt umsögn fjármálaráðuneytisins munu tekjur ríkissjóðs skerðast um 2,8 milljarða króna á ári (bls. 12-13).
  • Engin áform eru upp um að mæta því tapi með auknum tekjum og því þarf að skera niður í útgjöldum sem lækkuninni nemur.

Ríkisstjórnin hótar því að kalla þing saman í sumar ef Alþingi gerir ekki frumvarpið að lögum á næstu átta þingdögum. Svona frumvarp sem felur í sér enn frekari lækkun gjalda á útgerðir og auðmenn er hins vegar hvalreki á fjörur stjórnarandstöðunnar í aðdraganda kosninga.

Það er lítil því hótun í sumarþingi.

Björn Valur Gíslason
Latest posts by Björn Valur Gíslason (see all)
Flokkun : Pistlar
0,908