Björn Valur Gíslason 07/07/2014

Ekki einkamál Bjarna

Bjarni Benediktsson formaður sjálfstæðisflokksins vill selja vænan hlut ríkisins í Landsbankanum. Hann segist þó hvorki vera búinn að gera það upp við sig hvað stór sá hlutur á að vera né hvernig að sölunni verður staðið.Bjarni Benediktsson

Hann talar eins og um sölu á persónulegri eign sinni sé að ræða sem öðrum komi ekki við hvernig hann ráðstafar.

Málið er heldur flóknara en það.

Á síðasta degi þingsins fyrir jólin 2012 voru samþykkt lög um hvernig á að standa að sölu á eignarhlutum ríkisins í fjármálafyrirtækjum. Landsbanki Íslands er þar sérstaklega nefndur. Samkvæmt þeim lögum (sem enn eru í gildi) er heimilt að selja allt að 30% hlut í bankanum að nokkrum skilyrðum uppfylltum.

Bankasýsla ríkisins skal gera tillögu um sölu og annast sölu á eignarhlutum ríkisins.

Málið skal lagt fyrir tvær þingnefndir, efnahags- og viðskiptanefnd og fjárlaganefnd.

Seðlabankinn skal veita umsögn um hvort jafnræðis sé gætt á milli væntanlegra kaupenda.

Síðast nefnda atriðið kom inn í lagafrumvarpið að tillögu Eyglóar Harðardóttur ráðherra og Lilju Mósesdóttur. Því er ætlað að koma í veg fyrir að kaupendur geti keypt íslenskar krónur á afslætti í skiptum fyrir erlendan gjaldeyri og skapað þannig ójafnræði á milli hugsanlegra kaupenda.

Það kemur ekki á óvart að Bjarni Benediktsson lagðist hart gegn þessari lagasetningu eins og sjá má á umræðum um málið og atkvæðagreiðslu. Hann vill hafa frjálsar hendur um hvernig sameiginlegum eignum okkar allra er ráðstafað.

Það gekk svo vel síðast.

Björn Valur Gíslason
Latest posts by Björn Valur Gíslason (see all)
Flokkun : Pistlar
0,744