trusted online casino malaysia
Karl Th. Birgisson 07/10/2016

Ekkert andskotans me

Skoðanakönnunin sem Mogginn birti í dag er síðasta viðvörunin sem Samfylkingin fær fyrir þessar kosningar.Samfylkingin

Fylgi? Sex prósent, geriði svo vel. Þremur vikum fyrir kosningar. Helmingi minna en útreiðin sem Davíð Oddsson fékk í forsetakosningunum.

Hvað gerðist? Ég veit það ekki og held raunar að enginn viti það. Skýringarnar eru áreiðanlega margar.

Ég veit þó hvað gerðist ekki. Nefnilega ekkert. Eins og fyrirsjáanlegt var.

Eftir alla naflaskoðunina, innantökurnar, formannsskipti, kynjakvóta og aldurskvóta gerðist ekki neitt. Annað en að sumir kjósendur hlógu, hinir hnussuðu. Þeir sem héldu að öll sú tíma- og orkusóun myndi skila sér í auknu fylgi sönnuðu með því hvers vegna þeir eiga ekki að móta stefnu eða vinnubrögð fyrir stjórnmálaflokk.

En sleppum því. Skiptir minnstu á þessum tímapunkti, en algerlega nauðsynlegt að gleyma því ekki.

Því að nú er sumsé kosningabarátta. Eða það hélt ég.

Eina útspil flokksins hingað til er hið svokallaða forskot á húsnæðismarkaði. Það er alveg nothæft fyrir sinn hatt, einkum fyrir fólk sem vill kaupa húsnæði úti á landi, eins og Jón Daníelsson útskýrir í ágætri grein.

En: Þegar við öllum hefur blasað neyðarástand á húsnæðismarkaði árum saman og alveg morgunljóst að róttækar lausnir á því yrði eitt af stærstu kosningamálunum, þá lýsir það hvorki hugmyndaríki né metnaði (svo það sé nú bara kurteislega orðað) að bjóðast til að borga fólki fyrirfram skaðabæturnar fyrir hávaxtakrónuna – sem það fengi hvort eð er.

Kosningabarátta snýst ekki um að leggja fram hálfvolgar tillögur. Hún felst í því að moka skurði. Rífa kjaft og berjast fyrir sínu. Leggja allt í sölurnar. Hætta nánast sál sinni, lífi og limum.

Hún snýst heldur ekki um að halda fundi á Hallveigarstíg eða baka pönnukökur á kosningaskrifstofunni. Eða skiptast á að læka á facebook.

Með öðrum orðum: Kosningabarátta er ekkert andskotans me eða mjálm.

Hún er urr og gelt, og jafnvel einstaka glefs þegar nauðsyn krefur.

Samfylkingin hefur núna þrjár vikur til að sanna hvers vegna hún þykist eiga tilkall til þess að vera jafnaðarmannaflokkur Íslands.

Ef hún tekur ekki fram skóflurnar, brettir upp ermar og byrjar að moka á hún ekki skilið meira en þessi sex prósent.

Og varla það þó.

1,293