Eins og flís við rass

Allt bendir nú til þess að Guðni Ágústsson fyrrverandi ráðherra og formaður framsóknarflokksins verði dubbaður upp sem leiðtogi framsóknarmanna í Reykjavík í sveitastjórnarkosningunum í vor. Það fer líka vel á því enda er Guðni bæði hnyttinn og skemmtilegur, auk þess að vera strangheiðarlegur og sómakær stjórnmálamaður. Allt þetta og miklu fleira í fari Guðna er talið líklegt til að afla framsóknarmönnum mikils fylgis í höfuðborginni.

Það var t.d. mikið hlegið á nokkrum borðum á herrakvöldinu stuttu fyrir síðustu sveitastjórnarkosningar þegar Guðni skemmti viðstöddum með bröndurum af „tussunni á henni Hönnu Birnu“ og bólförum Sóleyjar Tómasdóttur sem báðar voru þá að sækjast eftir kjöri í borgarstjórn. Það voru aldeilis gamansögur sem Guðni gæti fært inn í sali borgarstjórnar í vor.

Fjárlaganefnd Alþingis var líka einróma í skýrslu sinni um ríkisreikning 2010 þar sem í ljós kom að Guðni hafði „gleymt“ að skila öllu andvirði á sölu lánasjóðs landbúnaðarins í ríkissjóð þegar sjóðurinn var seldur eins og annað góss í eigu ríkisins á þeim tíma. Penningana mun hann víst hafa notað sér og sínum til framdráttar eins og gengur og gerist á þeim bænum.

Af þremur ráðherrum framsóknarflokksins, Guðna, Halldóri og Finni, er Guðni án vafa þeirra líklegastur til að viðhalda framsóknarflokknum í því formati sem við þekkjum hann best. Hann smell-passar því í hlutverk leiðtoga framsóknarmanna í Reykjavík.

Eins og flís við rass.