Buslugarðurinn í Lúxembúrg

Vitiði hvað? Ég hef ekki hugmynd um hvað er satt eða ósagt í yfirlýsingum Bjarna Ben. og Ólafar Nordal um aflandsfélögin þeirra.

Og vitiði hvað? Þið hafið ekki hugmynd um það heldur.

Mig grunar reyndar að sitthvað sé ósagt í málunum báðum, en okkur er trúlega hollast bíða eftir Kastljósinu.

En – gefum okkur að ekkert sé ósagt og öll atvik séu eins og formaður og varaformaður Sjálfstæðisflokksins lýsa þeim. Hvað vitum við þá?

Bjarni Ben.: Það er í meira lagi sérkennilegt (ég nota ekki sterkari orð), að núverandi fjármálaráðherra landsins – þáverandi alþingismaður – kaupi hlut í félagi fyrir fjörutíu milljónir án þess að vita hvar það félag hefur lögheimili. Kom það ekki fram í öllum pappírunum? Hvað hélt Bjarni að Seychelles-eyjar væru? Sundlaugabuslugarður í Lúxembúrg?

Það er líka í meira lagi óþægilegt (ég nota ekki sterkari orð), að starfandi alþingismaður kaupi tugmilljónahlut í félagi með heimilisfang í skattaskjóli. Og finnist það bara allt í fína lagi. Lúxembúrg er nefnilega líka skattaskjól og ofarlega á lista yfir slík lönd í heiminum. Bjarna er engin afsökun í því að hann hafi staðið í alls kyns vafningum á þessum árum og að áður hafi verið fjallað um málið. Barasta alls engin.

Þetta er einfaldlega hreint ekki boðlegt.

Ólöf Nordal: Hennar saga virðist vera einfaldari. Það kemur ekki fram í yfirlýsingu hennar, en á facebook segir hún að þau hjón hafi fengið „umboð“ fyrir félag sem þau eignuðust aldrei og notuðu aldrei og aldrei varð neitt úr neinu. Ég er því miður ekki mjög verseraður í æðri viðskiptum, en hvað merkir að fá „umboð“ fyrir félag sem maður á ekkert í? Fengu þau prókúru? Fyrir félag sem einhver annar átti? Þetta er óþægilega óskýrt.

Í yfirlýsingunni nefnir hún hins vegar skýringar sem eiginmaður hennar hafi gefið þýzkum blaðamönnum á þessu öllu saman. Það er óheppilegt og ekki traustvekjandi að hún skuli ekki birta þær skýringar líka. Eiginmaðurinn hefur heldur ekki gert það, mér vitanlega.

Ein spurning vaknar nefnilega óhjákvæmilega: Hvað varð um viðskiptin með hlutabréfin og peningana, sem áttu að fara fram í gegnum þetta ónotaða félag, en urðu aldrei? Hvar fóru þau þá fram í staðinn? Ósköp væri gott að það upplýstist, svo að öllum liði betur.

(Ekki reyna að selja mér trixið þarna, um að þetta séu hans peningar og hans hagsmunir, en ekki hennar. Það hefur verið prófað í öðru máli og virkar ekki.)

———-

En vitiði hvað fleira við vitum? Á næstu dögum mun umræða um skattaskjól og pólitík og peninga fara endanlega út um víðan völl og moldviðrið verður svo mikið að enginn mun sjá neinn kjarna máls nokkurs staðar lengur.

Hann er þessi: Nei, Bjarni Benediktsson var ekki einn af kröfuhöfum bankanna á sama tíma og hann verkstýrði (svo) samningum við þá sömu kröfuhafa.

Og nei, það var ekki Ólöf Nordal sem ákvað vísvitandi, ekki af gáleysi heldur að yfirlögðu ráði, að halda þessum mikilvægu upplýsingum leyndum fyrir kjósendum fyrir kosningar og allt þetta kjörtímabil þangað til hún var neydd til að gangast við þeim.

Nei, það voru hvorki Bjarni né Ólöf. Sá sem gerði þetta heitir Sigmundur Davíð Gunnlaugsson. Fyrir utan nú allt hitt í þeirri fádæma furðusögu.

Í þeim samanburði verður buslugarðurinn í Lúxembúrg eiginlega hálfgert pjatt.