Brynjar og aukaatriðin

Brynjar Níelsson þingmaður sjálfstæðisflokksins virðist ekki átta sig á kjarna málsins. Það skiptir ekki öllu máli hver lak gögnum úr ráðuneyti Hönnu Birni Kristjánsdóttur. Það sem skiptir máli er að Hanna Birni Kristjánsdóttir ráðherra og varaformaður sjálfstæðisflokksins fól lögmönnum ráðuneytis síns að útbúa minnisblað í þeim tilgangi að sverta mannorð fólks eins og segir í niðurstöðu Héraðsdóms Reykjavíkur sem Hæstiréttur Íslands staðfesti sl. föstudag.

Eftir því sem ég best veit er ekkert fordæmi fyrir því að ráðherra í ríkisstjórn Íslands hafi verið kallaður til yfirheyrslu hjá lögreglu vegna aðildar að sakamáli. Eftir því sem ég best veit eru engin fordæmi fyrir því heldur að æðsti dómstóll landsins hafi komist að þeirri niðurstöðu að ráðherra í ríkisstjórn Íslands hafi með framferði sínu haft það beinlínis að markmiði að sverta mannorð fólks. Sem er grafalvarlegt mál.

Það er því í raun algjört aukaatriði hvor aðstoðarmanna ráðherrans lak minnisblaðinu til fjölmiðla.
Aðalatriðið er að ráðherrann notaði ráðuneyti sitt til að brjóta gróflega gegn fólki og hefur verið uppvís að ósannindum um málið frá fyrsta degi.