Bjarni á skilorði

Frá því að ríkisstjórn hægriflokkanna tók við völdum í sumarbyrjun 2013 hefur hún á nokkurra vikna fresti sent frá sér nokkuð sverar yfirlýsingar um afnám gjaldeyrishaftanna. Ævinlega er látið líta svo út að um tímamót sé að ræða og nú sé komið að því að aflétta höftunum. Enn hefur þó nákvæmlega ekkert gerst í þessa veru og enn er unnið eftir áætlun um afnám haftanna frá því í mars 2011. Um þetta hef ég skrifað áður, t.d. hér. 

Ef eitthvað er að marka mbl.is má vænta þess að formenn stjórnarflokkanna sendi enn á ný frá sér tilkynningu um enn eitt stóra skrefið við afnám haftanna. Það er víst von á nýrri áætlun í september í ár, rétt eins og í fyrra. Munurinn er sá að nú er búið að gefa áætluninni nafn. Áætlun sem þó er enn ekki til.  Ósamin áætlun er sem sagt komin með nafn. Það eru nýjustu tíðindin frá ríkisstjórninni um afnám haftanna.

Það sem má hins vegar lesa úr þessu og gætu talist tíðindi er að Bjarni Benediktsson, formaður sjálfstæðisflokksins, hefur fengið frest fram á haust til að reyna að semja um málið. Takist honum það ekki mun formaður framsóknar taka það úr hans höndum. Bjarni er sem sagt á skilorði af hálfu samstarfsflokksins undir heitinu „Project Irminger“.

Sem framsóknarmenn kalla víst „Project Bjarni“.