Átök á stjórnarheimilinu

Veruleg ólga er sögð vera á milli stjórnarflokkanna um breytingar á lögum um veiðigjöld. Frumvarp þess efnis hefur legið fyrir í nokkrar vikur en ekki enn verið afgreitt úr ríkisstjórn vegna andstöðu framóknarmanna sem óttast auknar óvinsældir verði frumvarpið lagt fram.

Sjálfstæðismenn eru annarrar skoðunar og vilja að frumvarpið verði kynnt sem allra fyrst og afgreitt með hraði. Þeim finnst mörgum nóg komið af óvinsælum málum og framgöngu framsóknarmanna sem mörg hver hafa bitnað illa á sjálfstæðisflokknum. Má í því sambandi benda á umhverfis- og náttúruverndarmál (Sigurður Ingi), utanríkismál (Gunnar Bragi) og stóru millifærsluna (Sigmundur Davíð). Sjálfstæðisflokkurinn þarf á máli að halda til að halda baklandi sínu rólegu.

Lækkun veiðigjalds er þannig mál fyrir þá á meðan framsóknarflokkurinn óttast að það verði olía á eld óánægju og mótmæla í aðdraganda kosninganna.

Nú eru hins vegar aðeins átta fundardagar eftir áður en Alþingi fer í frí. Það er ekki nægur tími til að afgreiða svo stórt mál – nema samkomulag náist um það við stjórnarandstöðuna og þá í skiptum fyrir annað, t.d. ESB umsóknina og breytingar á stóru millifærslunni.

Það gætu orðið snúnir samningar.