Uppgjör milli launamanna og stefnu forsætisráðherra.

Því er ákveðið haldið að almenning á Íslandi að krónan sé bjarghringur Íslands af tilteknum hópi fólks. Krónan er góð fyrir skuldlaust efnafólk, sem í reglulegum gengisfellingum krónunnar er gert sífellt ríkara með stórkostlegum eignatilfærslum innan íslensks samfélags. Í umræðum um stöðu okkar í efnahagslega séð er rætt eins og líf hafi byrjað á Íslandi í október 2008 eftir algjört kerfishrun og 50% gengisfellingu krónunnar og það hafi öll mælitæki verið núllstillt. Ráðanda öfl í íslensku samfélagi nýta öll tiltæk ráð til þess að halda í gjaldmiðil, sem valdhafar geta gengisfellt til að leiðrétta efnahagsleg mistök með því að færa hluta að launum verkafólks til sín.

 

Meirihluti þjóðarinnar hefur hins vegar bent á hversu stóran þátt krónan átti í þeim hamförunum sem skullu á landinu haustið 2008. Þá tapaði fjórðungur íslenskra heimila öllu og stóðu frammi fyrir ókleifu skuldafjalli. Kaupmáttur féll þá um 20% og atvinnuleysi nær þrefaldaðist. Hvers vegna stendur íslenskur almenningur mun verr eftir efnahagshrunið en t.d. almenningur í Danmörku, Svíþjóð, Finnlandi og jafnvel Írlandi? Þar bjó fólk við gjaldmiðil sem bauð ekki upp sömu geggjun og íslenska örmyntin gerir í ógnarlitlu hagkerfi.

 

Íslenskir launamenn búa við sveiflukenndan örgjaldmiðil sem hefur valdið því að síðan 1980 hafa að jafnaði farið um 12% af launum í að greiða vaxtamun milli Íslands og ESB, sem veldur hærra vöruverði og meiri húsnæðiskostnaði. Heildarkostnaður heimila launamanna á Íslandi af krónunni á þessum tíma samsvarar því að 30% af tekjum heimilanna. Þetta ástand verja útgerðar- og landbúnaðurinn af öllum mætti. Láglaunalandið Ísland hentar þeim. Umhverfi þar sem örmyntin skerðir sjálfkrafa kjör fólks og mylur áfram undir þessa atvinnuvegi.Öll stærstu fyrirtæki Íslands gera upp í evrum eða dollurum, rekstrarkostnaður krónunnar lendir þar af leiðandi á minni fyrirtækjum og launamönnum.

 

Íslenska krónan er svæsnasti óvinur íslensks launafólks og veikindi hennar nærast á lækkuðum kaupmætti fólksins og íslenskir launamenn eru ósáttir við afkomu sína. Sífellt fleiri verða að spara við sig í nauðsynjum, auk þess eru sett ný þjónustugjöld í skólum og aðkomugjöld að í heilbrigðisþjónustu. Það er búið að þrengja mikið að ráðstöfunartekjum venjulegs launafólks þegar það er farið að spara við sig í lyfjakaupum. Um 6.500 manns flutt frá Íslandi undanfarin ár flestir til Noregs. Það er ekki fólkið sem er á atvinnuleysiskránum sem er að flytja það er vel menntað ungt fólk sem sættir sig ekki við aðstæðurnar og þau störf sem bjóðast hér á landi.

 

Það er svo annað mál að langtímahorfur íslendinga í samanburði við margar aðrar þjóðir eru góðar. Þær eiga við að etja skuldavanda, ellilífeyrisvanda og skort á auðlindum. Endurnýjanleg orka er eftirsóttasta vara sem til er. Náttúruauðlindir hafa ekki endilega verið ávísun á ríkidæmi og velgegni. Þar má benda á Argentínu og Nígeríu. Í þessu sambandi má einnig bera saman hvernig Noregur nýtti sínar auðlindir í samanburði við Bretland.

 

Við erum að missa hæfileikafólk úr landi og með verðmæta þekkingu. Í jafnfámennu landi og Ísland er þetta dýrt því þetta veldur því að í mörgum tilfellum er ekki hæfasta fólki að störfum við hin erfiðu verkefni sem við verðum að leysa til þess að komast upp úr hjólförnum. Afleiðing þessa er kyrrstaða og það verður sífellt lengra í að okkur takist að ná stöðugleika í efnahags- og gjaldmiðilsmálum.

 

Öll helstu fyrirtæki landsins hafa hafnað krónunni og hún er líka ástæða þess að þekkingar- og hátækniiðnaðurinn er ekki með Ísland inn á blaðinu sem fjárfestingarkost. Sakir þess að eru hverfandi líkur á því að það takist að fjölga störfum á Íslandi og við verðum því að reikna með að ákveðin fjölgi hverfi úr landi í leit að störfum. Lífeyrissþegum mun þar að auki fjölga og aðför ríkisstjórnarinnar að Virk og úrbótum til handa öryrkjum mun valda því að hér verður sáralítill hagvöxtur næstu árin.

 

Ef við ætlum að rífa upp hagvöxt hér á landi verið að skapa um 20 þús. ný störf á næstu árum. Það er talin borin von að það takist með lokað hagkerfi. Erlendir fjárfestar fara ekki með fjármuni inn í hagkerfi þar sem ekki er hægt að ná arðinum tilbaka.

 

Það verður að segjast eins og það er ummæli forsætisráðherra um gjaldeyrishöft og sölu fyrirtækisins Promens eru ótrúleg. Einkennast af dylgjum og útúrsnúningum. Þau fyrirtæki sem hann er að veitast að hafa skapað langflest störf fyrir vel menntað fólk. Þessi fyrirtæki eru að flýja land.

 

Launamenn eru á leið í Karphúsið með lausa kjarasamninga. Þeir hafa sagt að ekki verði lengra gengið á þessari braut. Lagfæra verði misskiptinguna og skapa hér fjölbreytt og öflugt atvinnulíf til þess að koma í veg fyrir stöðnun í íslensku hagkerfi. Svar ríkisstjórnarinnar er að slíta öllu sambandi við helstu viðskiptalönd okkar og halda í ónýtan gjaldmiði. Það rennir stoðum undir að komandi kjaraviðræður muni snúast upp í kröfu um aðild að Evrópusambandinu og upptöku evru.