Elliði syngur falskt

Elliði Vignisson sendir þingmönnum sjálfstæðisflokksins neyðarkall í dag.

Ekki vegna fjárlagafrumvarpsins, niðurskurðarins í heilbrigðis- og menntakerfinu og ekki vegna þess að hætt hefur verið við byggingu á nýjum Herjólfi. Neyðarkallið er send út fyrir hönd útgerðamanna í Vestmannaeyjum og þeim til bjargar.

Ástæðan er frétt í dagblaði útgerðarmanna um að afkoma sjávarútvegsins hafi orðið lítið eitt verri á árinu 2013 en hún var árið á undan og að sjávarútvegurinn í heild sinni greiði  tæpa 9 milljarðar króna í tekjuskatt. Elliði heldur því einnig fram að afurðaverð á sjávarafurðum fari lækkandi.

Íslenskur sjávarútvegur hefur aldrei gengið betur en á undanförnum 4-5 árum. Fyrirtækin hafa skilað eigendum sínum góðum arði um leið og þau hafa greitt niður skuldir sínar í gríð og erg og fjárfest meira en áratugina þar á undan.

Samanlagður tekjuskattur sjávarútvegsins upp á 8,7 milljarða er jákvæð afleiðing góðrar afkomu, minnkandi skulda og þess að fyrirtækin eru uppiskroppa með uppsafnað tap frá fyrri árum. Tekjuskattur greinarinnar í heild upp á 8,7 milljarða getur heldur ekki talist vera há upphæð í samhengi hlutanna. Er t.d. lægri upphæð en auðlegðarskatturinn er sem á að fella úr gildi um áramótin.

Þvert á það sem Elliði heldur fram um þróun afurðaverðs, þá hefur það verið að hækka að undanförnu eins og sjá má á myndinni hér að ofan (IFS-greining). Verð á mjöli hefur t.d. hækkað um þriðjung á árinu sem hefur komið fram í afkomu uppsjávarfyritækja, m.a. af kolmunnaveiðum. Hlutabréf í HB-Granda, eina sjávarútvegsfyrirtækinu á hlutabréfamarkaðnum, hefur skiljanlega hækkað enda afkoman góð og eftirsókn er í kaup á fyrirtækjum í sjávarútvegi og aflaheimildum.

Allt þetta er vegna þess að það er sem betur fer góður gangur í greininni og framtíðin er björt öfugt við barlóminn í bæjarstjóranum í Eyjum.

Mínum uppáhalds sjálfstæðismanni (í augnablikinu)!