Auðveldir kjarasamningar framundan

Forsætisráðherra segir í grein um helgina að „Jöfnuður hefur aukist þrátt fyrir hraðan hagvöxt – Atvinnuleysi hefur farið minnkandi – 4.000 ný störf hafi orðið til á fyrsta ári ríkisstjórnarinnar  – Kaupmáttur hefur aukist meira á tímabilinu en nokkru sinni frá árinu 2007.“

 

Þetta segir okkur að ríkisstjórnin hafi tekið við ákaflega góðu búi af Jóhönnu annars væri þetta ekki mögulegt. Það er hins vegar algjörlega andstætt þeim gildishlöðnu fullyrðingum sem stjórnarandstaða Framsóknar og Sjálfstæðismanna hélt fram, kjörtímabil Jóhönnu.

 

Fullyrðingar núverandi forsætisráðherra standast hins vegar ekki skoðun, þessar tölur eru jú aldeilis prýðilegar miðað við hversu skammt er frá Hruni, en þær eru hins vegar nákvæmlega ekkert betri en þær voru síðasta starfsár Jóhönnu, jafnvel lakari í sumum tilfellum.

 

Þetta eru hins vegar mikilvæg skilaboð inn í undirbúningsvinnu við endurnýjun kjarasamninga í haust, en þá renna allir skammtímasamningar ASÍ félaganna út. Vinna við þá hefst í sumar og ummæli forsætisráðherra og svo ekki síður fjármálaráðherra nú fyrir helgina eru mjög gott innlegg í þá vinnu.

 

Það verður mun auðveldara að ná saman samningum ASÍ félaganna á grunni framangreindra upplýsinga frá forsvarsmönnum ríkisstjórnarinnar og ekki síður ummælum Bjarna fjármálaráðherra að allt að  16% launahækkun  raski ekki að neinu leiti verðbólgumarkmiðum ríkisstjórnarinnar og Seðlabankans.

 

Hin rétta aðferð sé fólgin í hinni einföldu aðgerð að semja um 2% launhækkun og síðan „réttmætar leiðréttingar“ fyrir viðkomandi starfshóp.

 

Ég reyndar oft sagt að ummæli þingmanna og ráðherra um kjarasamninga og mál atvinnulífsins endurspegli undantekningalítið yfirburða vanþekkingu á málefnum atvinnulífsins og helstu grunnreglum hagkerfisins