Úlfar Þormóðsson 06/01/2018

Ystingur

Málfrelsi í Natólöndum er í hættu. Nægir að nefna Bandaríkin, Tyrkland og Ísland. Forseti Bandaríkjanna hótar rithöfundi málsókn og heimtar  lögbann á bók hans. Forseti Tyrklands bannar útvarp, sjónvarp, dagblöð og netmiðla þar sem skýrt er frá annarri lífsskoðun en hann hefur. Þrotabú, kröfuhafar, banki eða hvað kalla á fyrirbærið hefur látið leggja lögbann á upplýsingar um íslenska menn og íslensk málefni sem fréttamiðillinn Stundin hafði undir höndum. Fyrirbærið undirbýr málsókn gegn tjáningarfrelsinu.

 

Nú er það svo, þó það fari ekki hátt í umræðunni, að atlaga að málfrelsi er á margan hátt áþekkur gjörningur og sá þegar einstakir menn, fyrirtæki og stofnanir, líta svo stórt á sig að þeir þurfi ekki að fara að landslögum sem þeim geðjast að en aðrir lúta.

Sömu mánuði og árás er gerð að málfrelsinu innan Natóríkjanna, sömu vikur og daga, brýtur sjálfur dómsmálaráðherrann á Íslandi lög af því að honum líkar ekki við lögin. Það er urgur í landslýð en ráðherrann situr áfram í embætti.

Svo gerðist það að dómsmálaráðherrann fær verkefni til úrlausnar, samskonar verkefni og hann braut lög við að ráða fram úr áður, að skipa menn og konur í dómarasæti. Herrann, sem er kona, taldi ekki rétt að hann/hún fengist við það þar sem honum/henni/  nú enn meira í nöp við gildandi lög en áður. Hann/hún fékk því flokksbróður sinn og kollega, löglærðan mann, til þess að sinna nýja verkefninu. Fyrsta verk staðgengilsins var að hleypa málinu í sama ysting og dómsmálaráðherrann gerði áður af samskonar tilefni af því að honum líkar ekki aðferðarfræðin sem beita skal við úrlausn málsins.

 

Ef fólk á að hafa trú á lögum og rétti er nauðsynlegt að ráðamenn þeirra mála fari að lögum og vinni eftir réttum reglum. Og ef ríkisstjórn vill halda virðingu sinni mega varla vera innan hennar lögbrjótar að störfum. Og helst ekki grautargerðarmenn heldur.

Þar sem það verklag hefur verið viðhaft hérlendis að formenn stjórnarflokka, hver og einn, ráði því hverjir sitji í ríkisstjórn er ljóst að formaður Sjálfstæðisflokksins þarf að velja tvo nýja ráðherra fyrr en seinna. Það ríður á. Mörg tilbrigði frelsis eru í hættu.

 

Fyrir það ber að þakka að svohljóðandi póstur barst textahöfundi eftir að greinin birtist:

Afsakaðu „facebook leysi“ mitt. Í ágætri grein þinni, Ystingur,
segir þú Gulla vera „löglærðan mann“ , en svo er ekki.
Háskólamenntun hans hljóðar upp á BA próf í
stjórnmálafræði,þar sem hann hefur eflaust lært ýmis trix, undir
handleiðslu ÓRG. Nei segi bara sisona.

Með nýárskveðju,  (fullt nafn)

 

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,419