trusted online casino malaysia
Úlfar Þormóðsson 13/07/2017

Úrtölukórinn

Það bætast sífellt nýjar raddir í kórinn. Margradda kórinn sem syngur um bölmóðinn og hefur gert vikum, mánuðum og  árum saman. Samkór úrtölusöngvara.

Nýjasti söngvasveinn er hótelhaldari. Hann hefur áður sungið í kvintett með meirihluta bæjarstjórnar í sinni heimabyggð. Hann söng byggðina á hausinn. Það var fyrir áratug eða svo. Hún er enn á hausnum, byggðin. En ekki hann, söngvarinn, Hann reisti sér hótel. Nú á hann það, hótel með svítu þar sem nóttin kostar miljón krónur. “Hér munu margir gista, þetta er besta svíta landsins,” söng hann í sjónvarp og opnaði dyrnar að svítunni.

En raunveruleikinn á það til að rugla drauma. Það gista ekki eins margir í svítunni og ætlað var, það kaupa ekki eins margir 25 þúsund króna steik í matsal hótelsins og vænst var, færri fá sér 7 þúsund króna rjómatertuna í kaffiteríunni en áætlanir gerðu ráð fyrir og sárafáir drekka þar 1500 króna kaffisopa.

Og þá er eitthvað að. Hvorki þó á hótelinu né rekstarmódelinu. Það er eittvað annað að. Annarsstaðar. Og hann veit hvað það er, hótelhaldarinn. Hann fer í kórinn. Þar vita allir hvað að er. Þeir kunna textann um það. Og lagið. Og þeir syngja, og syngja. Og skrifa og skrifa og tala og mala einum rómi um krónuna. Gengi krónunnar. Það er of hátt. Verðmæti krónunnar er að drepa ferðaþjónustuna. Hún er ekki of dýr, þjónustan. Álagningin er ekki of há. Það er krónan sem er of hátt skráð. Það er gengið sem er að drepa ferðaþjónustuna. Krónan.

Og þeir syngja og syngja. Út um holt og móa. Þeir munu syngja sjálfa sig upp og ferðaþjónustuna niður. Og gengið að sjálfsögðu líka. Syngja þar til hvort tveggja fellur, og skriðurnar leggjast yfir okkur hin, sem höfum hvorki löngun né þörf fyrir að gista í svítu fyrir miljón. Og ef að vanda lætur verða reikningar fyrir gerð svítunnar, hótelsins og vegna vangreiddra launa til hótelhaldarans með í áhlaupinu. Og við borgum þá, reikningana á meðan Úrtölukórinn syngur um nauðsyn á þjóðarsamstöðu og viðreisn. Og endurreisn. Og nýsköpun. Og um traust. Um  trú og traust á frjálsu framtaki.

Latest posts by Úlfar Þormóðsson (see all)
Flokkun : Efst á baugi
1,322