Uppvakning

Forstjóri Kauphallar Íslands, Páll Harð­ar­son var nýverið í viðtali við Þórð Snæ Júlíusson, rit­stjóra Kjarnans, í sjónvarpsþættinum 21 á Hring­braut. Í dag, 23.11.´18  birtir Kjarninn brot úr þættinum í máli og mynd. Þar kallar þessi postuli hallarinnar eftir því að Landsbankinn og Íslandsbanki verði skráðir á markað (einkavæddir). Orðrétt segir postulinn Páll:

„Nú svo geri ég mér vonir um, og held að það sé gríð­ar­lega mik­il­vægt, að bank­arn­ir, sem eru í eigu rík­is­ins, komi inn á mark­að­inn. Og ég held að þetta geti hrein­lega ráðið úrslitum um það að ná þessu mark­miði okkar að koma íslenska markaðinum okkar upp í flokk á meðal þess­ara bestu mark­aða í heim­i[…]”

Þessu til viðbótar vill hann “að ríkið íhugi leiðir til að skrá Landsvirkjun”, (einkavæða hana) svo notað sé orðfæri hans.

Það er sum sé búið að kveikja upp í kyndistöð hagvaxtarins, Kauphöll Íslands. Markmiðin eru skýr, vissan fyrir hendi. Ísland er best í heimi!

Við eigum að þekkja þennan forleik. Hann hefur verið leikinn fyrir okkur áður. Og öll sinfónían. Allt til loka. Og við erum ennþá með andlegar harðsperrur eftir. En nú, áratug eftir að flutningi lauk með brauki og bramli, telja kyndarar hagvaxtarins að kominn sé tími á annað tónaflóð við textann Ísland best í heimi. Aðra sinfóníu.  Aðra eins.

Er þetta ekki dásamleg sönnun fyrir framhaldslífi?