Úlfar Þormóðsson 24/09/2017

Upplausn

Upplausn í stjórnmálum er í algleymingi. Hræddasti karlinn í Fljótshlíðinni vill að Sjálfstæðisflokkurinn leggi höfuðáherslu á innflytjendamál. Þannig megi forðast umræðu um vandræðamál flokksins og vanhæfni við stjórn landsins. Annan hvern dag vill Flokkur fólksins líka leggja aðaláherslu á það sama. Þann daginn halda þeir því fram að flóttamenn sem hingað koma séu þjóðfélaginu svo dýrir að það geri að verkum að fátækt viðhaldist á Íslandi. Hinn daginn neita þeir að hafa sagt nokkuð í þessa veru.

Og Sigmundur Davíð. Nú er hann kominn á kreik. Laus úr viðjum flokksins. Maðurinn sem kynti undir útlendingaandúð í Framsóknarflokknum meðan hann réði þar fyrir daga opinberunar Panamaskjalanna.

Sigmundur er ef til vill ekki hræddur við útlendinga líkt og karlinn í Fljótshlíðinni og Magnús Hafsteinnson í Flokki fólksins. En hann veit að það er hægt að nota þá sem grýlu, að það er hægt að nota þá til þess að hræða fólk í var fyrir þeim, til sín, í hlýja faðminn hans.

Flokkur fólksins byggir tilveru sína meðal annars á ótta við útlendinga. Hið ókunna. Ef að vanda lætur mun Sigmundur Davíð líka hrella fólk með hinu ókunna, kannski kokkobaktaveirum eða hvað það var sem hann dró upp úr pússi sínu hér um árið til þess að sýna fram á ill áhrif erlendis frá. Og hræddu karlanir í Sjálfstæðisflokknum mælast til þess að talsmenn flokksins hrelli fólk með útlendingum. Sú umræða leiðir óhjákvæmilega af sér andúð, síðan fyrirlitningu og loks hatur á fólki annars staðar að úr heiminum.

Upplausnin er áhugaverð. Kátleg í stutta stund. En hún vekur Þórðargleði og er hættuleg til lengdar. Til þess að hún verði ekki viðvarandi þurfa allir þeir sem vita að fjölmenning getur, ef rétt er að málum staðið, alið af sér samfélag sem er auðugast allra félaga af hverskyns lífsgæðum; allir þessir þurfa að hlusta með opin eyru á hræddu karlana, andæfa þeim með lágstemmdum rökum. Þá mun upplausninni ljúki á kjördag.

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,477