Úlfar Þormóðsson 17/12/2017

Þrælslund

Íslensk utanríkisstefna hefur alla tíð einkennst að þrælslund. Á lýðveldistímanum hefur hún jafnan verið bergmál af stefnu Bandaríkjanna. Í stól utanríkisráðherra hafa nær undantekningarlaust setið ósjálfstæðir og óttaslegnir kallar sem kyngt hafa hverju því sem Kaninn hefur boðið, bauð og býður.

Þessa dagana er verið að ala á ótta hræddu karlanna með sögum, sönnum og lognum, um gríðarlegan fjölda rússneskra kafbáta í norðurhöfum. Og helvítis þrjótarnir eru að vasla og busla yfir sæstrengjum á hafsbotni, þráðunum sem tengja okkur við umheiminn, með það fyrir augum að taka okkur úr sambandi. Þetta verður að stöðva áður af verður. Og það getur enginn gert nema Kanninn, NATÓ-Kaninn. Þess vegna stendur til að flytja hingað nýtísku herþotur, njósnavélar, og staðsetja þær á Keflavíkurflugvelli svo þær geti svifið um háloftin og fylgst með því hvað Rússarnir eru að bardúsa á hafsbotni. Kaninn segir að það þurfi að gera þetta. Það varði heimsfriðinn, hvorki meira né minna. Þessu trúa hræddu karlarnir og þrælslund þeirra mun bjóða þeim að fara að óskum handhafa valdsins, handhafa hervaldsins.

Í Silfri Sjónvarpsins í dag, 17.12.´17, var rætt við ungt fólk, forsvarsmenn alþjóðasamtaka um útrýmingu kjarnorkuvopna, en samtökin fengu nýverið firðarverðlaun Nóbels fyrir sáttmála, sem þau hafa boðið ríkjum heims að ganga að, um útrýmingu vopnanna. Fyrr á þessu ári samþykktu Sameinuðu þjóðirnar þennan sáttmála. Eitthundrað tuttugu og tvö ríki – 122. En. Ekki Bandaríkin, ekki NATÓ- ríkin. Ekki Ísland. Ekki hræddu karlarnir sem ráða utanríkisstefnu Íslands. Þeir eru þrælar herveldis. Þeir vilja halda í kjarnavopnin. Þau sefa hræðslu þeirra, fela manndómsleysið,

Af tilefninu er ekki úr vegi að rifja upp orð Þorsteins Erlingssonar þegar hann kvað af öðru tilefni um lundarfar óttafullra smjðrara.

  • Það er hart, að hróður þann
  • hundar af manni drógu,
  • að þeir flatar flaðri en hann
  • framan í þá sem slógu.
  • Þrælslund aldrei þrýtur mann,
  • þar er að taka á nógu;
  • hann gerði alt, sem hundur kann,
  • hefði hann að eins rófu.
Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,434