Þau hamast og hamast

Fyrir liðlega fimm árum dró fréttastofa RÚV til baka frétt og baðst afsökunar á henni. Í fréttinni lýsti viðmælandi fréttamanns yfir ánægju sinni með aðgerðir stjórnvalda til að koma til móts við skuldavanda fólks vegna Hrunsins. Ástæðan fyrir því að RÚV dró fréttina til baka var að viðmælandinn, Tryggvi Guðmundsson hafði tengsl við Vinstri græn á Dalvík. Það var mat fréttastofu RÚV eftir kvartanir frá hægrimönnum að það hefðu verið mistök hjá fréttamanni sínum að kanna ekki pólitískan bakgrunn viðmælandans áður en fréttin var birt.

Ólíkt RÚV dró visir.is sömu frétt hvorki til baka né baðst afsökunar enda þá ekki til siðs hjá þeim að spyrja um pólitískar skoðanir viðmælenda sinna.

Fyrir nokkrum dögum skrifuðu tveir þingmenn hægriflokkanna grein undir fyrirsögninni „Friðhelgin rofin“. Í greininni segja þau að í barnaþættinum „Stundin okkar“ hafi verið að sjá „ … innslög sem lituðust mjög af pólitískum áróðri“ eins og segir í greininni. Þau kröfðust afsökunarbeiðni sem þau fengu og urðu auðvitað afar glöð með.

Frosti Sigurjónsson þingmaður framsóknarflokksins stofnaði á sínum tíma vefsíðu sem hafði það hlutverk eitt að fylgjast með fréttaflutningi á RÚV. Frosti hefur skrifað margar greinar um málið á heimasíðu sinni þar sem hann og félagar hans af hægrivæng stjórnmálanna kvarta jafnt yfir fréttaflutningi, innlendum sem erlendum, meintu hlutdrægni og pistlahöfundum á RÚV.

Frosti gengur meira að segja svo langt að segja fréttamenn RÚV „hagræða fréttum“ eða m.ö.o. að segja ósatt. Meðal fylgismanna Frosta á þessari síðu var/er Illugi Gunnarsson núverandi mennta- og menningarmálaráðherra og æðsti yfirmaður RÚV. Frosti hefur nú sagt sig frá þessum hópi, ekki vegna þess að hanna hefur skipt um skoðun heldur vegna þess að hann telur það ekki samrýmast þingstörfum.

Margt fleira má nefna í þessa veru um ógeðfelldu tilhneigingu hægrimanna til að reyna að knýja fréttastofu RÚV hlýðni við sig og sjónarmið þeirra. Það er af nógu að taka.

Nú eru þingmenn hægriflokkanna eru farnir að liggja yfir barnaefninu RÚV í sama tilgangi. Enda eins og þeir segja sjálfir: „Börnin læra það sem fyrir þeim er haft.“

Það er engin hætta á öðru en að þau Frosti Sigurjónsson, Karl Garðarsson og Elín Hirst og aðrir þingmenn hægrimanna muni passa upp á börnin læri rétt.

Jafn óhugnanlegt og þetta er nú.