Það er kúkur í lauginni

Staksteinar Moggans segja frá því í dag (21.04.´17) að Styrmir Gunnarsson, fyrrum ritstjóri blaðsins telji vandamál vera að hrannast upp „á sjóndeildarhring ríkisstjórnarinnar“. Styrmir álítur að andstaða fimm þingimanna Sjálfstæðisflokksins vegna fyrirhugaðrar hækkunar virðisaukaskatts á ferðaþjónustu sé alvöru uppreisn og „gæti verið vísbending um meiri pirring innan þingflokksins af einhverjum (öðrum) ástæðum en fram hefur komið.“

Einnig telur Styrmir ákvörðun Þorgerðar Katrínar Gunnarsdóttur um skipan nefndar til að skoða veiðigjöld líklega til að valda áhyggjum innan Sjálfstæðisflokksins. Þá gerir hann ráð fyrir að athugasemdir Páls Matthíassonar, forstjóra Landspítalans, vegna sölu Vífilsstaðalands eiga hljómgrunn víða í samfélaginu og að sú sala eigi eftir að valda miklum deilum. Þá býst hann við að stjórnin muni eiga í basli vegna kjaramála lækna, einkavæðingu bankanna 2003 og 2009 og sölu á hlutum í Arion banka.

Fleiri hafa eitt og annað að segja um stefnu ríkisstjórnarinnar. Á Staksteinasíðu Morgunblaðsins má lesa þetta: „Miðstjórn Alþýðusamband Íslands (ASÍ) mótmælir harðlega nýrri fjármálaáætlun ríkisstjórnarinnar og telur hana alvarlega aðför að velferðarkerfinu …“

Um sama mál segir kjarninn Kjarninn í dag: „Fjár­mála­ráð, óháð ráð sér­fræð­inga sem hefur metið fjár­mála­á­ætlun stjórn­valda fyrir árin 2018 til 2022, segir að stjórn­völd séu frekar að stíga létt á bens­ín­gjöf­ina, með áætl­un­inni, meðan þau ættu í reynd að vera að bremsa.“

Um þetta sama segir Fréttablaðið: „Fjármálaráðherra, Benedikt Jóhannesson, hyggst halda sig við að lækka virðisaukaskatt þrátt fyrir að sérfræðingahópur á vegum stjórnvalda telji að lækkunin geti ógnað stöðugleika.“

Og um enn annað vandræðamál stjórnarinnar segir Fréttablaðið: „Illa gengur að fá skýr svör um afstöðu Óttars Proppé heilbrigðisráðherra varðandi málefni Klíníkurinnar. Landlæknir hjólaði svo af hörku í ráðherrann í gær og sagði óskýra afstöðu ráðuneytisins valda því að einkarekin heilbrigðisþjónusta lekur í gegnum göt kerfisins. „

„Það eru augljóslega erfiðir dagar fram undan hjá hinni nýju ríkisstjórn,“ hafa Staksteinar eftir fyrrum ritstjóra sínum og ekki ósennilegt að hann hafi rétt fyrir sér. En sjálfsagt hangir hún áfram á uppgerð og ólíkindum, stjórnin, því hagsmunagæsla fyrir frændur, vini og fjármagnseigendur kostar sitt. Það vita þeir. Og það vissu þeir þegar þeir settust saman.