Úlfar Þormóðsson 17/05/2018

Snilldin mesta

 

Ef Sjálfstæðisflokkurinn kemst til valda í Reykjavík heitir hann því að láta ráðast í lagningu Sundabrautar. Þá ætlar flokkurinn, undir forystu Eyþórs Laxdal Arnalds, að láta undirbyggja ný íbúðahverfi á Keldnalandi, annað á landfyllingum við Grandann og enn eitt í Örfirsey.

Allt þetta og mikið meira á að gera.

En á þessu er einn hængur. Hann hefur borgarstjóraefnið Arnalds bent á. Það er óreiða í fjármálum borgarinnar. Og skuldsetning hennar er rosaleg. Segir hann. Í Staksteinum, aukaleiðara Morgunblaðsins, er einmitt fjallað um skuldamálin í dag, 17. maí. Greinin er ómerkt, en þannig stíluð að hún getur varla verið eftir nokkurn annan en sjálfan Eyþór L. Arnalds, meðeiganda að blaðinu. Þar segir:

“Reykjavík glímir við að minnsta kosti þrjú risastór og vaxandi vandamál. Í fyrsta lagi er fjárhagur höfuðborgarinnar slæmur. Borgin er gríðarlega skuldsett og mælist með neðstu sveitarfélögum þegar fjárhagur þeirra er borinn saman.”

Borgarstjóraefni Sjálfstæðiflokksins, Eyþór, ætlar ekki bara að láta byggja íbúðahverfi og leggja brautir. Hann ætlar líka að laga skuldastöðuna. Þar hefur hann aldeilis ráð í hendi, Laxdal. Kynnti það á blaðamannafundi í gær. Og málgagn Arnalds, Morgunblaðið, sem var enn og aftur í fjöldreifingu í dag, skýrir stolt frá snjallræði frambjóðandans:

Þá “hyggst flokkurinn lækka útsvar í Reykjavík úr 14,52% í 13,98% í fjórum þrepum á fjórum árum.”

Og er þá ekki von að spurt sé: Er til arðbærari reiknikúnst en sú, að með því að auka útgjöld og lækka tekjur sé hægt, á sama tíma, að grynnka á skuldum? Er tiltæk meiri snilld en þetta?

Úlfar Þormóðsson
Úlfar Þormóðsson

Latest posts by Úlfar Þormóðsson (see all)

Flokkun : Efst á baugi
0,483